Туулай жил юу юугүй мориллоо. Зурхайчид янз янзаар тольдож буй. Нүүдэлчдийн уламжлалаар ерөөл билигээрээ олон зүйлийг угтаж, үддэг тул ирэх жилийг төрийн түшмэдүүд нь ухаалаг, энэрэнгүй, хулгайч, хуудуучдын үйл хомсдож, түмний хөдөлмөр, зүтгэлийн үр шим арвидахыг хүн бүхэн хүсч буй нь ойлгомжтой.

Ирэх жил зурхайн тольд ямар буухаас үл хамааран гагцхүү төрийн үйл хэрэг шударга байхыг ард түмэн ямагт шахаж шаардах цаг юу юунаас илүү мөн. Дарангуйлал давраад толгой дээр гарах шахсан ийм цаг үед угаас эрх чөлөөний сэтгэлгээг уламжлалаасаа ойлгодог монголчуудын хувьд хэрсүү холч ухаанаар үр хүүхдийнхээ ирээдүйг бодсон үг үйлдэл хүн бүрээс гардаг бол цаг аяндаа эерэх болов уу.

Цөөхөн монголчууд аливаа хагаралдан тэмцэлдэх, харлуулан гутаах бус хамтдаа хэлэлцэн, буруутанг бусгах аргагүйгээр хуульд даатгаж, зөв санаатай бол хэнийг ч уухайлан дэмжиж төр улсаа цэгцлэх цаг. Улс эх орноо мөрөндөө тулан авч явах залуу үе харь газар бусдын харцанд хөлс хөдөлмөрөө зориулж, эх орондоо хүн шиг амьдрахын тулд зүтгэсээр.

Монголд өмнө нь хэзээ ч байгаагүйгээр дарга нарын эрх ямба задарч, ард түмний ахуй амьдрал ядарчээ. Гэвч ихийг үзэж, бэрхийг туулсан монголчууд шүд зуусаар.