Улсын төсөв бол татвар төлөгч иргэдийн хөлс хүч шингээн, хамаг үнэтэй бүхнээ хамааруулах капитал, ирээдүйд үр хүүхдээ сайхан амьдруулах эх орон үлдээхээр зорьсон хөрөнгө оруулалт болохоос хэдхэн улс төрчдийн, хоёр гурван намын наргиан цэнгээний хэрэгсэл, хоосон ширээн дээрх үнэгүй бялуу биш сэн.

Сүүлийн үед улсын төсвөөр хэрэггүй барилга, байшин, хөшөө дурсгал барих үзэгдэл гаарлаа. Тухайн орчин нөхцөлдөө тохирсон, ирээдүйд хэрэгтэй, судалгаа төлөвлөлттэй бус хулгайн мөнгөө хуудуутай аргаар угааж, хэдхэн гэр бүлийн хээнцэрлэх, ноёрхох хандлагыг төрийн албанд загвар болгон авлигын систем эсэн бусын аргаар төгөлдөржих боллоо.

Хууль хэрэгждэг, эх оронч улс төрчид төрд зонхилдог улсад бол эл бусармаг хандлагыг аль эрт үндсээр нь таслах ёстой. Гэтэл манайд засаг захиргааны нэгжүүдэд халдварлан, хурган дарга нар хувьдаа баяжих хүсэлдээ хөтлөгдөн төрийн сэнтийг түмний богцонд гараа дүрэх боломж хэмээн ойлгох болжээ.

Авлигалын торыг бөөсчлөн түүх, төсвөөс хулгайлахыг төгрөгчлөн хорих анхны алхам, оновчтой аргын нэг нь төсвийн мөнгөөр хөшөө дурсгал гэх мэтийн хэрэггүй зарлага гарган яран дээр шарх нэмэх хэрэггүйг бодит байдал илэрхийлдэг.

Доройтсон эдийн засгийг сэхээх цөөхөн боломжуудын хамгийн чухал нь дотоодын хулгайчдаа цэгцлэх эрс шинэчлэл, хуулийн үйлчлэл, шүүх засаглалын реформ болой.