Монголд залуучууд нэг ажлын байрны тодорхойлолт, хөдөлмөрийн гэрээгээр ажлын байран дээрээ 2-3 хүний хийх ажлыг зэрэг амжуулдаг ба ингэж ажилласан ч сарын хэрэгцээгээ дөнгөн данган хангах төсөр цалин авч байгаа билээ. “Хөдөлмөр эрхлэлтийн түвшин төдийлөн нэмэгдэхгүй төдийгүй ажлын байрны чанар муудаж, нийгмийн шударга ёсыг бэхжүүлэх асуудал удаашрах хандлагатай байгаа нь хөдөлмөрийн нөхцөл муудах үндсэн шалтгаан болж байгаа ажээ.

Олон улсын хөдөлмөрийн байгууллага (ОУХБ)-ын шинэ тайланд дурдсанаар эдийн засгийн өсөлт удааширч, баталгаагүй, чанар муутай, цалин бага, нийгмийн хамгаалалд хамрагдах боломжгүй нөхцөлөөр хөдөлмөр эрхлэхэд хүрч болзошгүй бөгөөд Ковид-19-ийн хямралаас шалтгаалан тэгш бус байдал улам гүнзгийрч, цааш даамжрах хандлага харагдаж байна. Эдийн засаг удааширснаар олон хүн чанар муутай ажилд орж, цөөн цагаар цалин багатай ажил эрхлэхээс аргагүй байдалд хүрч байна.

Үүгээр зогсохгүй бараа бүтээгдэхүүний үнэ хөдөлмөрийн бодит орлогын өсөлтөөс илүү өндөр байгаа нь амьжиргааны өртөг нэмэгдэн ядууралд өртөх эрсдэлийг нэмэгдүүлсээр байна Зохистой хөдөлмөрийг дэмжиж, нийгэмд шударга ёсыг бэхжүүлэх маш тодорхой бөгөөд яаралтай хэрэгцээ байна.

Тулгарч буй бэрхшээлийг даван туулахын тулд бид нийгмийн шинэ яриа хэлэлцээг дэлхийн хэмжээнд өрнүүлж, хамтран ажиллах шаардлагатай." Хөдөлмөрийн хөлсний хэмжээг нэмэгдүүллээ ч бодит үнэлэмж болж чадахгүй байгаагийн шалтгаан нь үнийн өсөлтийн хурдыг гүйцэх чадамжгүй эдийн засгийн чадавх сулыг харуулж байгаа хэрэг.Ажил олгогч нар хямд зардлаар их ашиг олохын тулд ажилчдынхаа цалин хөлсийг нэмэхээс эрс татгалзсаар ирсэн нь залуучууд эх орноосоо дайжиж гадаадад хөдөлмөрлөх үндэс суурь болдог. Хөдөлмөрийн насныхан тэр чигээрээ боломж олдвол гадаадад гарч өндөр цалинтай ажил хийх, чанартай боловсрол эзэмших мөрөөдөлтэй байна.Харамсалтай нь энэ хүсэл эрмэлзэлдээ хүрч чадаж байгаа хэсэг нь тун бага хувьтай.

Д.ЭНХБАТ