Монгол Улсын Ерөнхий сайд Г.Занданшатар 2026 оны төсвийн төслийг боловсруулахад олон нийтийн оролцоог хангаж ажиллахыг төсвийн ерөнхийлөн захирагч нарт үүрэг болгосон. Энэ дагуу төсвийн төслийг боловсруулах үйл явцад иргэдийг оролцуулж, ил тод, нээлттэй төсвийн шинэчлэлийг эхлүүлж буй.

Олон нийтээс санал авах үйл ажиллагаа 2025 оны наймдугаар сарын 1-ний өдрөөс орон даяар эхэлж, саналыг 11-11 төв, E-Mongolia апп болон яамдын цахим хуудсаар авч байгаа билээ.

Өнөөдөр буюу наймдугаар сарын 4-нөөс эхлэн 14-ний өдрүүдийг хүртэл танхимаар олон нийтийн хэлэлцүүлэг салбар бүрээр зохион байгуулж эхлээд байна. Энэ хүрээнд нийт 12 хэлэлцүүлэг болох юм.

Хэлэлцүүлэгт оролцох иргэн цахимаар болон биечлэн бүртгүүлж, ирэх оны төсвийн төслийг боловсруулах үйл явцын хоёр дахь үе шатанд оролцох боломжтой.

Олон нийтээс санал авах танхимын хэлэлцүүлгийн дараа эдийн засгийн үр ашигтай, зардал бууруулах саналыг нэгтгэн эрэмбэлж, 2026 оны төсвийн төсөлд тусгахаар төлөвлөөд буй юм.

Б.ЖАРГАЛ