Сүхбаатар аймгийн Сүхбаатар суманд хээрийн түймэр гарч, 500 га талбай өртжээ. Хээрийн түймэр гарсан тухай дуудлагыг есдүгээр сарын 30-ны өдрийн 10:40 цагт холбогдох албаныхан хүлээн авсан байна.

Дуудлагын дагуу тус аймгийн Онцгой байдлын газрын Эрэн хайх, аврах салбарын алба хаагчид, сумын Мэргэжлийн ангийнхан, Зэс, молибдений уурхайн “Моли металл” ХХК-ийн ажилтнууд, орон нутгийн иргэд ажиллажээ. Улмаар есдүгээр сарын 30-ны өдрийн 16:50 цагт цурамд оруулан, мөн өдрийн 18:25 цагт бүрэн унтраасан байна.