Иргэн Б.Энхжаргал УИХ-ын нийтийн өргөдөл хүлээн авах D-Parliament цахим системд ипотекийн зээлийн жилийн хүүг 6 хувиас 4 хувь болгон бууруулах санал гаргажээ.

Ингэхдээ тэрбээр "Ипотекийн зээл нь иргэдийг орон сууцтай болгох, залуу гэр бүлийн амьдралын нөхцөлийг сайжруулах, гэр бүлийн санхүүг дэмжих нь төрийн бодлогын чухал хэрэгсэл юм. Гэвч өнөөдөр орон сууцны үнэ өндөр, өрхийн өдөр тутмын хэрэглээний зардал нэмэгдсэн, цалин орлогын өсөлт амьжиргааны зардлыг бүрэн нөхөхөд хүндрэлтэй байгаа нөхцөлд 6 хувийн хүүтэй урт хугацааны зээлийн төлбөр олон өрхийн хувьд санхүүгийн томоохон дарамт болж байна. Зээлийн хүүг 6 хувиас 4 хувь болгон бууруулснаар иргэдийн сарын эргэн төлөлт багасаж, өрхийн орлогод эзлэх зээлийн дарамт буурна. Ингэснээр иргэдийн гар дээр үлдэх орлого нэмэгдэж, хүүхдийн боловсрол, эрүүл мэнд, хүнс, ахуйн хэрэгцээ зэрэг зайлшгүй зардлаа санхүүжүүлэх боломж дээшилнэ. Мөн зээлээ хугацаандаа төлөх чадвар сайжирч, өрхийн санхүүгийн эрсдэл буурах эерэг үр нөлөөтэй. Энэ нь зөвхөн одоо ипотекийн зээл төлж байгаа иргэдийн асуудал биш юм. Орон сууцтай болох хүсэлтэй, зээлийн өндөр төлбөрөөс шалтгаалан байр авч чадахгүй байгаа олон мянган залуу гэр бүл, хөдөлмөр эрхлэгч иргэн бүрийн ирээдүйтэй холбоотой асуудал юм. Тиймээс дараах саналыг гаргаж байна.

• Ипотекийн зээлийн жилийн хүүг 6 хувиас 4 хувь болгон бууруулах,
• Одоогийн 6 хувийн хүүтэй зээл төлж байгаа иргэдийг боломжит нөхцөл, шалгуурын дагуу 4 хувийн хүүтэй нөхцөлд шилжүүлэх боломжийг судалж хэрэгжүүлэх,
• Анх удаа орон сууц худалдан авч байгаа залуу гэр бүл, тогтмол орлоготой иргэдэд ипотекийн зээлийн хүртээмжийг нэмэгдүүлэх,
• Хүү бууруулахтай холбоотой санхүүжилтийн эх үүсвэр, бодит боломж, хэрэгжүүлэх арга замыг Төр, Монголбанк болон холбогдох байгууллагууд хамтран яаралтай судалж шийдвэрлэх,
• Энэхүү асуудлаар иргэдийн саналыг бодитоор сонсож, шийдвэр гаргалтад тусган, хэрэгжилтийн талаар олон нийтэд нээлттэй мэдээлэх,

Ипотекийн зээлийн хүүг бууруулах нь зөвхөн зээлдэгчдэд үзүүлэх дэмжлэг бус, өрхийн санхүүгийн дарамтыг бууруулж, дотоодын хэрэглээ, амьдралын чанар, гэр бүлийн санхүүд эергээр нөлөөлөх бодлогын арга хэмжээ гэж үзэж байна. Энэхүү санал нь нэг хүний бус, орон сууцны зээлтэй болон орон сууцтай болох хүсэлтэй мянга мянган иргэний нийтлэг хүсэл, эрх ашиг, нэгдмэл дуу хоолой юм.

Төр засаг иргэдийнхээ бодит амьдрал, санхүүгийн нөхцөл байдлыг харгалзан үзэж, энэхүү саналыг анхааралдаа авч, 4 хувийн ипотекийн зээлийг хэрэгжүүлэх бодит шийдвэрийг гаргахыг хүсэж байна. Гэр бүл бүрт орон сууцтай болох боломжийг нэмэгдүүлж, өрхийн амьжиргаанд бодит дэмжлэг үзүүлье" хэмээжээ.

Уг өргөдлийг есдүгээр сарын 30-нд гаргасан бөгөөд санал авах хугацаа аравдугаар сарын 30-нд дуусахаар байна. Хэрэв энэ хугацаанд 100 мянган хүн дэмжиж гарын үсэг зурвал эл асуудлыг УИХ-аар авч хэлэлцэх юм.

Гарын үсэг зурах холбоос: https://petition.parliament.mn/Detail?id=95686f10-6a68-46c6-ad7e-ffb542e214c4