Э.Бөхбат: Хүүхэд томчуудын замын хөдөлгөөний дүрэм зөрчилтийн золиос болж байна

У.Уранцэцэг / Хууль

-ХҮҮХЭД ОСОЛД ӨРТӨЖ БУЙ ШАЛТГААН НЬ ТОМЧУУДЫН БУРУУТАЙ ҮЙЛДЭЛ БАЙДАГ-

Хүүхэд өртөж буй зам тээврийн осол, хэргийн талаар болон осол гарахад нөлөөлж буй гол шалтгаан, анхаарах асуудлын талаар ТЦА-ны Урьдчилан сэргийлэх хэлтсийн дарга, цагдаагийн хурандаа Э.Бөхбатаас тодрууллаа.

-Урин дулааны цаг ирж байгаатай зэрэгцэн хүүхдүүд зам тээврийн осолд өртөх тохиолдол нэмэгддэг. Он гарсаар нөхцөл байдал хэр байна вэ?

-Замын хөдөлгөөний дүрмийн анхан шатны мэдлэгийг хүүхдэд олгох, замын хөдөлгөөнд аюул, осолгүй оролцуулах дадал эзэмшүүлэх, осол хэрэгт өртөхөөс урьдчилан сэргийлэх асуудал нь төрийн болон төрийн бус байгууллага, иргэн бүрийн эрхэм үүрэг боловч иргэд хөдөлгөөнд оролцогч нар замын хөдөлгөөний аюулгүй байдлыг хангадгүй сахин биелүүлдэггүйгээс хүүхэд томчуудын замын хөдөлгөөний дүрэм зөрчилтийн золиос болж осолд өртөх явдал буурахгүй байна.

Өнгөрсөн 2018 онд зам тээврийн осолд 1049 хүүхэд өртсөнөөс 1004 хүүхэд эрүүл мэндээрээ хохирч, 45 хүүхдийн амь нас хохирсон.

Эдгээр хохирсон хүүхдийн 882 буюу 84% нь нийслэлд, амь насаа алдсан хүүхдийн 34 буюу 73,3% нь орон нутгийн замд бүртгэгдсэн бөгөөд шалтгааныг нь авч үзвэл хүүхэд тээвэрлэлтийн явцад аюулгүй байдлыг хангадаггүй, харгалзах хүнгүйгээр замын хөдөлгөөнд оролцуулдаг, хөдөлгөөний хурдыг хэтрүүлдэг болон ЗХД-н ямар нэг зүйл заалтыг зөрчсөн үйлдэлтэй шууд холбоотой байна.

Дээрх зам тээврийн осолд өртсөн нийт хүүхдийн 66,5% нь явганаар, 26,8% нь зорчигч, 6% нь унадаг дугуйгаар замын хөдөлгөөнд оролцож байхдаа хохирсон байна.

2018 онд нийслэлд явганаар замын хөдөлгөөнд оролцож байхдаа гэмтсэн 590 хүүхдийн 48,2% нь насанд хүрсэн харгалзах хүнтэй хөдөлгөөнд оролцож байсан бол 51,8% нь харгалзах хүнгүй ганцаараа эсвэл насанд хүрээгүй найз, ах, эгч, дүү нартайгаа замын хөдөлгөөнд оролцож байсан байна.

2019 оны эхний дөрвөн сард улсын хэмжээнд 219 хүүхэд зам тээврийн осолд өртсөний 56 нь гэмтэж ,16 хүүхэд амь насаа алдсан багэмтсэн хүүхдийн 57% буюу 32 нь нийслэлд, амь насаа алдсан хүүхдийн 75% буюу 12 нь орон нутагт бүртгэгдсэн судалгаа байна.

-Хүүхдүүд ихэвчлэн сургууль, гэрийнхээ хооронд явахдаа л осолд өртдөг гэж ярьж байсан. Ер нь жолоочийн буруутай үйлдэл дийлэнх байдаг у. Зорчигч хүүхдүүдийн буруутай үйлдэл их байдаг уу? Гол шалтгаан нь юу байна вэ?

-Улсын хэмжээнд зам тээврийн осолд өртсөн нийт хүүхдийн 160 нь нийслэлд бүртгэгдсэн ба тэдгээрийншалтгааныг нарийвчлан авч үзвэл 104 хүүхэд явган зорчигч, 51 хүүхэд зорчигч хэлбэрээр, хоёр хүүхэд унадаг дугуйтай хөдөлгөөнд оролцож байсан бөгөөд 89,4% нь буюу 93 нь ганцаараа болон эцэг эх, асран хамгаалагч, найз нөхдийн хамт ГАРЦГҮЙ ГАЗРААР зам хөндлөн гарч байхдаа, 10,6% нь 11нь ГАРЦТАЙ ГАЗРААР зам хөндлөн гарч байхдаа осолд өртсөн судалгаа гарсан байна.

Дээрх үзүүлэлтийг өмнөх оны мөн үетэй харьцуулахад хүүхэд өртсөн осол 24,5%-иар буурсан байх боловч гэмтсэн хүүхэд 93%-иар, амь насаа алдсан хүүхэд хоёр дахин өссөн. /Өөрөөр хэлвэл өнгөрсөн оны мөн үед найман хүүхэд нас барж байсан бол энэ онд 16 хүүхэд амь насаараа хохироод байна./

Хүүхэд зам тээврийн осолд өртөж буй голлох шалтгаан нь эцэг эх, багш сурган хүмүүжүүлэгчид, томчуудын буруутай үйлдэл байна. Өнөөгийн нийгэмд эцэг эх, багш сурган хүмүүжүүлэгч бид хүүхдийнхээ мэдлэг боловсролд анхаарал хандуулдаг ч аюулгүй амьдрах ухаан, аюулгүй байдлаа хангах боловсролд анхаарал хандуулахгүй байгаатай шууд холбоотой юм.

Ийм учраасхүүхдийн аюулгүй байдалд онцгой анхаарч, сургуулийн өмнөх болон сургуулийн наснаас нь аюулгүй байдлаа хангах анхан шатны мэдлэг боловсрол олгох, зөв дадлыг эзэмшүүлэх, тэдэнд зөв үлгэр дуурайлал үзүүлж ирээдүйгээ авран хамгаалахыг уриалж байна.