Улс төрийн нөхцөл байдал ээдрээтэй, үүссэн асуудлуудыг шийдэж чадалгүй хаврын чуулганыг хаах төлөвтэй. МАН-ын талцал улам эрчилж байхад наадам эхэлж улс төр амрах нь. АН, ХҮН ч дотоод хөдөлгөөний эрчим өндөртэй байгаа. МАН, АН, ХҮН гээд УИХ-д суудалтай бүх намууд ирэх намар хуулийн дагуу Их хурлаа хуралдуулж дарга, удирдлагаа солихоос эхлээд ротаци хийнэ. Үүнтэй холбоотой хөдөлгөөн өнөөдрөөс эхэлсэн бололтой. МАН-ын Бага хурал ирэх пүрэв гаригт хуралдаж Их хурлынхаа товыг гаргах мэдээлэл ч байна. Үүнтэй зэрэгцээд АН-ын бүлэгт ч хөдөлгөөн орох сурагтай. Тодруулбал, бүлгийн дарга О.Цогтгэрэл албан тушаалаасаа бууж Х.Тэмүүжин түүний орыг залгах яриа дэгдээд байна. Энэ процесс ирэх долоо хоногоос хэтрэхгүй гэж эх сурвалжууд өгүүлж байна.