-Удирдах зөвлөлийн дэргэд Хүртээмж ба тэгш оролцооны бодлогын хороог байгуулж, даргаар нь УИХ-ын гишүүн О.Саранчулууныг томилов-

Монгол Ардын намын Удирдах зөвлөл өнөөдөр /2025.12.04/ хуралдав. УИХ-ын 2024 оны ээлжит сонгуульд Монгол Ардын намаас дэвшүүлэн оролцсон мөрийн хөтөлбөрийн биелэлтийг хангах, намын 31 дүгээр Их хуралд Монгол Ардын намын дарга Н.Учралын танилцуулсан “Гишүүн төвтэй нам 4-Е стратеги”-ийг хэрэгжүүлэх зорилгоор намын Удирдах зөвлөлийн дэргэд Хүртээмж ба тэгш оролцооны бодлогын хороог нэмж байгуулж, тус хорооны даргаар УИХ-ын гишүүн О.Саранчулууныг томиллоо.

Тус хороо нь хөгжлийн бэрхшээлтэй иргэдийн эрх, оролцоо, хүртээмжийг төрийн бодлого, хууль тогтоомж, төсөв, төлөвлөлтийн төвд байршуулж, Монгол Улсын бүх салбарт саадгүй, тэгш оролцоотой хөгжлийн шинэ загварыг бий болгох зорилготой ажиллах юм.

Монгол Ардын намын Удирдах зөвлөлийн /2025.11.20/ хуралдаанаар өмнө нь бодлогын долоон хороог байгуулсан бол дээрх Хүртээмж ба тэгш оролцооны бодлогын хороо найм дахь нь болж байна.

Тодруулбал:

1. “Гишүүн төвтэй нам 4-E стратеги”-ийг хөгжүүлэх бодлогын хороо
2. Хүний хөгжил, боловсрол, шинжлэх ухааны бодлогын хороо
3. Дэд бүтэц, хөгжлийн төслүүдийн бодлогын хороо
4. Хот байгуулалтын бодлогын хороо
5. Эдийн засаг, банк санхүүгийн бодлогын хороо
6. Төрийн бүтээмж, засаглалын шинэчлэлийн бодлогын хороо
7. Хөдөөгийн хөгжлийн бодлогын хороо
8. Хүртээмж ба тэгш оролцооны бодлогын хороо