ХЗБХ: Нэр дэвшигч Д.Зүмбэрэллхамыг ШЕЗ-ийн шүүгч бус гишүүнээр томилуулахаар дэмжив

Aдмин / Хууль

Улсын Их Хурлын Хууль зүйн байнгын хорооны өнөөдрийн (2021.12.01) хуралдаан 10 гишүүн хүрэлцэн ирснээр эхэлж, Шүүхийн ерөнхий зөвлөлийн шүүгч бус гишүүнд Д.Зүмбэрэллхамыг нэр дэвшүүлэх асуудлыг хэлэлцэн шийдвэрлэлээ. Хуралдааныг Улсын Их Хурлын гишүүн Ц.Мөнх-Оргил даргалсан юм.

Шүүхийн ерөнхий зөвлөлийн бүрэлдэхүүнд хяналтын шатны шүүхээс нэг, давж заалдах болон анхан шатны шүүхээс тус бүр хоёр шүүгчийг Нийт шүүгчийн чуулганаас нууц санал хураалтаар сонгох бол шүүгч бус бусад таван гишүүнийг нээлттэй сонгон шалгаруулалтын үндсэн дээр Улсын Их Хурал томилох хуулийн зохицуулалттай.

Улсын Их Хурлын 2021 оны намрын ээлжит чуулганы Пүрэв гарагийн (2021.11.25) нэгдсэн хуралдаанаар Шүүхийн ерөнхий зөвлөлийн шүүгч бус гишүүнийг томилох тухай асуудлыг хэлэлцэн, таван нэр дэвшигчийн дөрвийг нь буюу Наранчулууны Отгончимэг, Нямсүрэнгийн Мөнгөнцэцэг, Навагчамбын Баасанжав, Ренчиндоржийн Онончимэг нарыг Шүүхийн ерөнхий зөвлөлийн шүүгч бус гишүүнээр томилохоор шийдвэрлэж, холбогдох Улсын Их Хурлын тогтоолыг баталсан юм.

Иймд Байнгын хороо өнөөдрийн хуралдаанаараа нэр дэвшигч Д.Зүмбэрэллхамыг Шүүхийн ерөнхий зөвлөлийн шүүгч бус гишүүнээр томилуулах асуудлыг хэлэлцсэн юм. Хуралдааны үеэр Улсын Их Хурлын гишүүн Б.Энхбаяр, Ш.Раднаасэд болон Ц.Сэргэлэн нар нэр дэвшигчээс асуулт асууж, хэлэлцэж буй асуудалтай холбогдуулан байр сууриа илэрхийлэв. Нэр дэвшигч Д.Зүмбэрэллхам гишүүдийн асуултад хариулт өгсөн. Түүнчлэн Улсын Их Хурлын Тамгын газрын Хууль эрх зүйн газрын ахлах зөвлөх М.Үнэнбат гишүүдийн лавласны дагуу сонгон шалгаруулалт болон уг асуудлыг хэлэлцэх зохицуулалтын талаар тайлбар хийв. Байнгын хорооны дэмжсэн нэр дэвшигчийг Улсын Их Хурал томилохоос татгалзсан бол сонгон шалгаруулалтад оролцож, ажлын хэсгийн гишүүдийн олонхын санал авсан дараагийн нэр дэвшигчийг хэлэлцүүлэх зохицуулалт Монгол Улсын шүүхийн тухай хуульд бий гэх тайлбарыг тэрбээр өгөв. Хууль зүйн байнгын хороо 2021 оны арван нэгдүгээр сарын 17-ны өдрийн хуралдаанаараа Шүүхийн ерөнхий зөвлөлийн шүүгч бус гишүүнд ажлын хэсгийн гишүүдийн олонхын санал авсан Н.Отгончимэг, Д.Эрдэнэчимэг, Н.Баасанжав, Р.Онончимэг, Д.Зүмбэрэллхам, Н.Мөнгөнцэцэг нарын талаар хэлэлцсэн юм.

Дараа нь санал хураалт явуулахад хуралдаанд оролцсон 10 гишүүний 60 хувь нь нэр дэвшигч Д.Зүмбэрэллхамыг Шүүхийн ерөнхий зөвлөлийн шүүгч бус гишүүнээр томилуулахыг дэмжсэн тул энэ талаарх санал, дүгнэлтээ чуулганы нэгдсэн хуралдаанд танилцуулахаар боллоо гэж Улсын Их Хурлын Хэвлэл мэдээлэл, олон нийттэй харилцах хэлтсээс мэдээлэв.


Сэтгэгдэл

Зочин [202.9.40.15] 2021-12-02 04:29:44

Хүрэлсүгийн эсвэл данхан толгойт ийн хармаанд байсан болоод зүтгүүлж байгаад томилчихиймаа

Зочин [192.82.75.19] 2021-12-01 14:56:19

Үнэндээ энэ улсад энэ улс төрд шудрага зүйл нэгээхэн ч үгүй юм даа яана даа бурхан минь зөв бодолтой шудрага хүмүүс хайрлаач ээээ

Z [64.119.21.77] 2021-12-01 10:29:59

Заавал энэ хүн байх ёстой юм шиг зүтгүүлсээр тавих юмаа.шудрага байгаач.ард түмэн мэдэж байгаашдээ.шившигүүд


3 сэтгэгдэл байна
1000 тэмдэгт оруулах үлдлээ.
Уншигчдын бичсэн сэтгэгдэлд Medee.MN хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.
3 сэтгэгдэл байна
Уншигчдын бичсэн сэтгэгдэлд Medee.MN хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.