ХЕЛЬСИНКИ. /BBC/. Финландын Ерөнхий сайд Санна Марины хувийн үдэшлэгт оролцож буй дүрс бичлэг цацагдсаны дараа түүний өгсөн мансууруулах бодисын шинжилгээний хариу сөрөг гарсан талаар тус улсын Засгийн газар мэдээлжээ. Өдгөө 36 настай С.Марин үдэшлэгийн үеэр өөрийнх нь гаргасан зан авиртай холбоотойгоор олон нийтийн дунд үүсээд байсан эргэлзээг тайлах зорилгоор шинжилгээ өгөхийг баасан гарагт зөвшөөрсөн байна.

Тэрбээр мансууруулах бодис огт хэрэглэж байгаагүй бөгөөд үдэшлэгийн үеэр ямар ч хууль бус үйлдэл хийгээгүй хэмээн мэдэгдсэн ч согтууруулах ундаа уусан гэдгээ хэлжээ. Нийгмийн сүлжээнд цацагдсан дүрс бичлэгт С.Марин Финландын поп од тэргүүтэй найз нартайгаа хөгжилдөж байгаа нь харагдсан байна.

Засгийн газрын мэдэгдэлд Ерөнхий сайдын шинжилгээнд мансууруулах бодис илрээгүй болохыг цохон тэмдэглээд, тэрбээр шинжилгээний төлбөрийг өөрөө төлсөн гэдгийг дурджээ. Францын “AFP” агентлаг Ерөнхий сайдын зөвлөх Иида Валлиныг эш татан мэдээлснээр, С.Марины шээсний сорьцод кокаин, амфетамин, каннабис, опиоидын шинжилгээ хийсэн байна.

Өнгөрсөн долоо хоногт болсон хэвлэлийн бага хурлын үеэр сэтгүүлчид 2019 оноос хойш Ерөнхий сайдын албыг хашиж буй С.Маринаас тухайн үед Засгийн газрын шийдвэр гаргах шаардлага тулгарсан бол чадах байсан эсэх талаар нь тодруулжээ. Үүний хариуд тэрбээр, тухайн үед үүргээ биелүүлэх чадвар “маш сайн” байсан гэдгээ онцлоод, өөрийгөө хэзээ ч мансууруулах бодис хэрэглэж байгаагүй гэдгийг тодотгон хэлсэн байна.

Монтенегро улсын Ерөнхий сайдын албыг Дритан Абазович хашиж эхлэхээс өмнө дэлхийн хамгийн залуу засгийн газрын тэргүүнээр нэрлэгдэж байсан С.Марин үдэшлэгт оролцсоноо олон нийтээс нуудаггүй бөгөөд хөгжмийн наадамд оролцож байхдаа үе үе камерын дуранд өртдөг байна. Өнгөрсөн онд тэрбээр “COVID-19”-өөр халдварласан хүний ойрын хавьтал болсныхоо дараа клубээр үйлчлүүлснийхээ төлөө олон нийтээс хүлцэл өчжээ. Энэ сарын эхээр Германы “Bild” сонин С.Мариныг “дэлхийн хамгийн “догь” ерөнхий сайд” хэмээн тодорхойлжээ.

Э.Хулан

Эх сурвалж: "Монцамэ" агентлаг