УИХ-д өргөн баригдсан хуулийн төслүүдээс энэ долоо хоногт казиногийн хууль олны хэл аманд нэлээд өртлөө. Эрх баригчдын тайлбарлаж буйгаар энэ хуулийн төсөл монголд валютын урсгал нэмэгдэх сайн талтай гэгдэж буй ч мөрийтэй тоглоомыг дагасан хууль бус далд гэм хэрэг цэцэглэх вий гэсэн болгоомжлол ч иргэдийн зүгээс хэлж буй юм. Мөн тоглоомын эрх зүйн орчин бүрдүүлэх гэж хайран үнэ цэнэтэй цаг хугацааг үрэгдүүлж, төрийн аппаратыг ажиллуулж, улсын төсвийн зарлагыг зарцуулж ийм төсөл оруулж байгаа нь цаг үеэ олоогүй мэдрэмжгүй болж таараад байна. Эдийн засгийн үзүүлэлтүүд сайжрах хүлээлтгүй иргэдийн амьжиргаа улам хэцүүдэж, үнийн өсөлтөд нэрвэгдсээр байхад баян цатгалан орныг дуурайж янз бүрийн үр ашиг муутай, бодит орчин нөхцөлдөө буух боломжгүй хуулийн төслийн хойноос төрийн ажил цалгардаж байгаа нь харамсалтай. Хөдөө хотгүй хямралын үеийг гатлах гэж малчид ган зудад зүдэрч, нийслэлчүүд утаа, түгжрэл, ажилгүйдэл ядууралд доройтсоор. Мөн хоолойд тулчхаад нэн яаралтай шийдэл хүлээж суугаа асуудлын нэг бол Улаанбаатар хотын ус дулаан, цахилгааны хүрэлцээ төдийгүй тэдгээрийг хариуцан ажиллуулдаг төрийн мэдлийн компаниудын алдагдал, нөөцийн хомсдол аюул дагуулж мэдэхээр байна. Үүнд УИХ, ЗГ-ын гишүүд анхаарал хандуулж, ухаанаа уралдуулж, гарц гаргалгаа, шийдвэрлэх эрх зүйн таатай орчин бүрдүүлэхэд хүч бололцоогоо дайчлан ажиллах нь тэдний иргэдийнхээ өмнө хүлээсэн үүрэг төрийн нэрээр андгайлсан тангаргынх нь учир утга байлтай.