Хөгжлийн банкны “Нотлох баримтыг шинжлэн судлах” сонсгол нэртэй хэлэлцүүлэг, шүүх хурал, мэтгэлцээний аль болох нь мэдэгдэхгүй асуулга, ярилцлага өнөөдөр төрийн ордонд боллоо. Сонирхолтой нь эл хуралд сөрөг хүчний лидерүүдээс Ерөнхий сайд асан Н. Алтанхуяг, Ерөнхийлөгч асан Х. Баттулга нар гэрчээр дуудагдан оролцсон нь нийгэмд асуудлыг ус тосоор нь ялган харах боломж олголоо. Гэхдээ төрийн нэрийн өмнөөс сонсгол удирдаж буй хуульч, эдийн засагч мэргэжилтэй хоёр ч УИХ-ын гишүүн асуудлаа ойлгоогүй, хөнгөн хуумгай, хэт явцуу туйлширсан байр сууринаас аливаад хандаж, сэтгэлийн хөдөлгөөнөөр уур амьсгалыг түрэв.

Хэдий асуулга тавьж, сонсгол зарлаж буй түр хороо буюу ялангуяа УИХ-ын гишүүн Т.Доржханд, Т. Энхбаяр нарын зүгээс улс төрийн өнцөгөөс өрсөлдөгч намынхаа лидерүүдийг төрийн механизс ашиглаад ч хамаагүй буулган авах гэж оролдсон ч талаар өнгөрлөө.

• Нэгдүгээрт тэд төмөр замын асуудлаар тухайн үеийн засгийн газар, салбарын сайд нарын УИХ, ЗГ-ын тогтоолтой шийдвэрүүдийг хэлэлцэж буй ч Н. Алтанхуяг, Х. Баттулга гэдэг хоёр улс төрчийг л “хулгайч” гэж харагдуулахаар зорьсон нь хэрсүү ард түмний дургүйцэл эрх баригч нам, тэднийг хүчлэн чиглүүлдэг бүлэглэлийн эсрэг улам дэвэргэх нь тэр.
• Хоёрдугаарт зүгээр нэг бага сургуулийн эцэг эхийн хурал бус Монгол улсын хөгжил дэвшил, төрийн эрх барих байгууллагуудын бодлого шийдвэрүүдтэй холбоотой асуудлыг хэлэлцэж, асуудлыг цогцоор нь ярих гэж байгаа бол асуудлын үндэс суурийг маш сайн ойлгосон, Монгол улсын эрх ашгийг нэн тэргүүний зорилгоо болгосон хүмүүсээр удирдуулах хэрэгтэй сэн. Гэтэл хурал даргалагч маань сонсголд хэлэлцүүлж буй асуудлаа ч ойлгоогүй, слайдаа ч өөрөө хянаж бэлдүүлээгүй, шал дэмий будилуутан цаг үрэх соёлгүй, төлөвлөлтгүй бүдүүлэг байдал ажиглагдлаа.
• Гуравдугаарт төрийн бодлого шийдвэрийг гардан биелүүлж, том төсөл санаачлан хийж хэрэгжүүлж байсан лидерүүд, бусдын шидсэн чулуугаар ийш тийш бөндөгнөх популист, хуумгай улс төрч хоёрын хооронд дахь алд дэлэм зай ба хувь хүний хувьцаа эзэмших, хамтарч компани байгуулах эрх, хууль зөрчөөгүй л бол ямар ч бизнес эрхлэх эрх чөлөө рүү халдан довтолж, үр хүүхэд, төрсөн ах, эгч дүүсээр нь яллан, эрүүдэн шүүхийг хүссэн рецедив хандлагатай нөхдүүд, улсын бие даасан хөгжил, экспортын бүтээн байгуулалтыг ойлгох ч хүсэлгүй хүйтэн цэвдэг шинэчүүдийн галзуурал урдаг нохой гартаа ганц ч модгүй хүн рүү дайрах шиг л хачин жигтэй харагдлаа. Бодлого, популизм хоёр ингэж зөрдөг аж.

Тэжээгчийнхээ заавраар юу ч хийхээс буцахгүй ийм хандлага монголын өнөөгийн хямралын гол шалтгаан, аюултай шимэгчлэл болчихсон нь гашуун үнэн юм.