Монгол нүүдлийн мал аж ахуй руу хүчтэй сөрөг дайралт агуулсан нийтлэл, бичвэр, хандлагууд сүүлийн үед ихээр ажиглагдах боллоо. Тухайлбал нэгэн иргэний бичсэнээр “...УИХ-ын зарим гишүүд байгаль орчны харъяа байнгын хорооныхон бэлчээрийн мал аж ахуй орших үндэс болсон отрын бүс нутгийн статусыг устгаж, захиргааг татан буулгах шийдэлд хүрлээ” гэв. Харин удалгүй өдрийн сонины зарим мэдээ, нийтлэлд “нүүдлийн мал аж ахуй бол дур зоргынх” гэх гарчигтай дотроо огт Монгол сэтгэлгээгүй, харьж ойлголтоор Монголын уг үндэс, оршихуй, соёлын уламжлал дархлааг цогцоор нь агуулсан нүүдлийн сонгодог МАА-г гутаан доромжилсон байна. Уг нийтлэлийн агуулга нь бэлчээрийн малаас суурин фермерийн аж ахуйд шилжих зорилт дэвшүүлсэн гэх арьс нөмөрсөн ч дотроо Монголыг монголоор нь үгүйсгүүлэх, соёл уламжлал, дархлааны эд эсийг устгах харийн хорт бодлого нэвт шингэжээ.

Жишээ нь Монгол үндэстний эртнээс эдүгээ хүртэл бахархал нь байсаар өдгөө бид төрийхөө сүлдэнд эрхэмлэн залдаг адууг стратегийн хувьд хэрэггүй мал… гэхчлэн хөрстөөс арчих санаархал агуулснаа нуугаагүй бол монголчуудын адууны соёлтой хамт тээж буй бүхий л сайн сайхан үнэт зүйл рүү халдаж, бидний уг үндсийг үгүйсгэж байгаагаас ялгаагүй.

Хэрэв төдийгөөс өдий хүртэл гагц таван хошуу малаа бус өч төчнөөн мянганы агуу өв соёлыг амьдаар нь өнөөгийн зуунд авч ирсэн малчдыг бэлчээрийн мал ахуй орхиод суурин амьдралаар амьдрахыг зааж сургах гэж байгаа бол эхлээд Монгол Улс оршин тогтнохоо больж аль нэг гүрний хараат, түүхий эдийн бэлтгэн нийлүүлэгч, дуулгавартай зарц болох юм.

Өөрөөр хэлвэл оршихуйгаараа дархлагдаж, орчин үеийн хэрцгий нийгмийн хурдацаас юу ч шаардахгүйгээр бие даасан хувийн өмчөө гар дээрээ эрхлээд биднийг хоол хүнсний дутагдалд оруулаагүйнх нь төлөө бүх татвар хураамжаас чөлөөлж малчдын нийгмийн даатгалыг төр төлөх хэрэгтэй. Төрд хувийн өмчийг улаан цагаан үнэгүйдүүлж, үгүй хийж, зүсэн зүйлийн аргаар хулгай хийж цулайсан харьжсан хурлийз цустнууд үүрэлчхээд мөр толгой холбодог бүхэнд мөнгө төлж унаган ахуй, улс үндэстнийг минь мөхөөхөөр мохоодог цөвүүн цаг иржээ.