Нүүрсний гэх тодотголтой хэрэгт яллагдагчаар татагдсан УИХ-ын гишүүн асан Т.Аюурсайхан, “Эрдэнэс Тавантолгой” ХК-ийн захирал асан Б.Ганхуягт нарын 11 хүнд холбогдох шүүхийн урьдчилсан хэлэлцүүлэг өнөөдөр /2023.09.20/ Чингэлтэй дүүргийн Эрүүгийн хэргийн анхан шатны шүүхэд болж байна. Тус шүүх хурлын урьдчилсан хэлэлцүүлэг есдүгээр сарын 11-нд эхэлсэн ч яллагдагч Б.Ганхуяг бүх шүүгч нараас татгалзсанаар тодорхойгүй хугацаагаар хойшилсон юм.

Гэвч шүүхээс Б.Ганхуягийн шүүгчээс татгалзах хүсэлтийг хүлээн авсангүй. Иймд хурлыг н.Халиун шүүгч үргэлжлүүлэн явуулахаар болмон.

Түүнчлэн Шүүх хурлын үеэр шүүгдэгч Б.Ганхуяг Чингэлтэй дүүргийн Эрүүгийн хэргийн анхан шатны шүүхэд хандаж, нүүрсний хэргийг илрүүлэхэд хууль шүүхийн байгууллагатай хамтран ажиллах хүсэлтээ илэрхийлж, "хамгаалалт, баталгаа гаргаж өгөх"-ийг хүслээ. Тэрбээр "Надтай холбоотой байж болох хүн баригдаж, хоригдож шалгагдаж байгаа. Гэтэл яг шалгагдах ёстой хүмүүс нь шалгагдахгүй байна. Чингис хаан банктай холбоотой хэргийг надад хамаатуулж байна.

Үндэсний хөрөнгө оруулалтын банктай холбоотой зүйлийг сугалаад аваад үлдсэн байна лээ. Үнэхээр шалгах бол МАН-ынхан, нүүрсний хэрэгт холбоотой бүх хүнийг шалгах шаардлагатай. Тиймээс намайг суллаад, хамгаалалт гаргаж өгөхийг шүүхээс хүсэж байна" гэв.