Санаанд багтамгүй их тоо баримт ярьж зуу зуун их наядаар шахам нүүрс хулгайлж хил давуулсан хэргийн тухай сүр бадруулцгааж дүн өвлөөр түмний жагсаал эсэргүүцлийн эрчинд шударга ёс, хуулийн хариуцлага амласан эрх баригчдын тэмцэл жолоо цулбуураа алдаж эхлэв бололтой. Эхэндээ эзэд нь ч тодорхой эдлэх ял нь ч бэлэн гэмээр ил тод шахуу нүүрсний болоод урьд өмнөх авлигалын хэргүүдтэй хүчлэн тэмцэх марш хангинаж байсан ч өдгөө улс төрийн дулимагхан шуугиан болж эхэллээ.

Ганц нэг золиосны этгээдүүд шорон шүүхээр хэдэн сар явахаараа өвчин хууч тоочицгоож хэлмэгдсэн, хэлмэгдүүлсэн гэх эмгэнэлт жүжгийн эхлэл өрнөл төгсгөлийн найруулга хийцгээх.

Нүүрсний хэрэгт аанай л эрх баригчдын манлай удирдлагууд элдэв баримтаар холбогдоод ирэхээрээ ийм тийм авлигачдыг илчлэх гэж байгаа учир над руу дайрлаа гэцгээн толгой эргүүлцгээх.

Чухам л хулгай будилааны чих дөжрөм нүргээн дунд ард түмний анзаарга алдагдах боллоо. Шударга үнэнийг шүүх засаглалаас хайх ёстой ч үнэндээ итгэх аргагүй гашилсан ээдэмний хөгцөрсөн сав шиг болцгоосон гэх. Энэ бүхний туйлын үнэн гэвэл үнэн харагдах гэж худлаа ярьсан нь бус үгэндээ багтаж далайцтай зүтгэлтэй ажиллаж авлигалын аймшигт хар сүүдэр, хүйтэн хэрцгий дарангуйлалд цэг тавьж чадсан нь л гэрэл гэгээг бодитоор тусгах юм.

Д.Энхбат