Эрдэнэс тавантолгойн 1072 ш хувьцааг Монгол хүн бүр эзэмшдэг болсон нь уул уурхайн баялгийг ард түмэнд хуваах анхны сонгодог хувилбар болжээ. Гэвч бодит үнэлгээ, үр өгөөж нь нэг л дутуу дулимаг байна уу гэж хардагдах олон өнцөг бий. Түүх сөхвөл Тавантолгойн нүүрсний орд газрыг Хятадын төрийн өмчит компанид 100 жилээр эзэмшүүлэхээр төр засгийн шийдвэр гарч байсан ч иргэний хөдөлгөөнүүдийн идэвхтэй тэмцлийн улмаас дэлхийд томоохонд тооцогдох энэ орд газар Монголдоо үлдсэн юм.

Гэхдээ 100 хувь ард түмний өмч мөн үү гэвэл бас л эргэлзээтэй. Учир нь УИХ-ын дарга асан З.Энхболд хэвлэлд саяхан ярилцлага өгөхдөө энэ бүлэг орд газрыг тал хувийг эрх баригч намын болон "Эм Си Эс" групп эзэмшдэг хэмээн зарим ноцтой мэдээллийг хүргэсэн юм.

Товчхондоо ард түмэнд баялгийг нь бүрэн бүтэн эзэмшүүлэх, үр өгөөжийг нь тэгш хүртэхэд хойрго ханддаг эдийн засаг, улс төрийн явцуу эрх ашгийг урьтал болгодог бүлэглэл амь бөхтэй оршсоор буйн нотолгоо болов уу. Сүүлийн жилүүдэд нүүрс алт зэсийн ханш дэлхийн зах зээлд өндөр байна.

Тэгэхээр ямар нэг нарийн тооцоолол хийх шаардгачхаагүйгээр бодож үзэхэд ашигтай ажиллангаа ард түмэндээ хувьцааны ногдол ашгаа тараах бодлого Эрдэнэс тавантолгойн үүрэг гэх. Гэтэл эрх баригч намын сонгуулийн сурталчилгааны хэрэгсэл гэж харагдахаар бодит үр ашиг тооцоот хөрөнгө оруулалт мөн эсэх нь ч тодорхойгүй байдлаар үрэлгэн хөөрүү эсвэл дөхөн доогуур хулгайн луйврын хумслалт болчих хардлага төрөхөөр зарим мэдэгдлүүдийг албаны хүмүүс хийж эхэллээ. Нүүрсний асар их хулгай, хариуцлага алдсан шат шатны дарга нарын хэргүүд, нэг тулгамдаад буй асуудлуудад шийдэл шийдвэр, зохих үр дүнг хүлээж буй ард түмнийг цагаан сарын баярыг өмнө Тавантолгойн хувьцааны ногдол ашиг гэж гулууз маханд хүрэхгүй төгрөгөөр түр хуурах гэж үү.

Д.ЭНХБАТ