Улаанбаатар хотын гэр хорооллыг гудамжнуудаар их цасны шар ус нэлийж, дагтаршиж үнс холилдон бохирт идэгдсэн хөрс лаглайж шавартан эвгүй үнэр ханхалж зуны үргэлжилсэн борооноос илүүгээр хот тэр чигтээ норжээ. Цасны асар их ус хөрс рүү шингэж дэвтээн зарим гуу жалгаар үерлэн урсаж, газрын хөрс нэлдээ ус шүүрч байна. Орон сууц барилга байгууламжуудын хундаам руу ус нэвтэрч хазайлт өгөх, стандартын шаардлага хангахгүй нь нурах аюул ч бий. Дөрвөн өндөр уулын дундах хөндий, голын ай савд газар метроны төсөл хэрэгжих найдлага хэр байгааг нарийн тооцоолол, судалгааны үндсэн дээр тогтоох болов уу.

2013 оны Улаанбаатар хотод метро барих судалгаанаас харахад зардал нь асар их буюу 2057 он хүртэл үр ашгаа өгөх нь бүү хэл байнга алдагдалтай ажиллаж, эдийн засагт хор хохирол учруулахаар байгаа гэх эл төслийг барьж байгуулахад шинэчилсэн судалгааны дүгнэлт,тайлан шаардлагатай нь ойлгомжтой..

Метро бариад түгжрэлийг шийдье гэж бодоход цасны шар ус,лаг шаварт шигдэж буйгаа хүртэл шийдээгүй хотын цалгар шаазгай байдлаас харахад чухам ямар үр дагавар гарахыг таашгүй. Метроны хонгил руу өвөл зунгүй ус урсаж, цэвдэг , хөлдөлт гэсэлтийн нөлөөгөөр байнга хөрсний байдал өөрчлөгдөх тооцооллыг маш сайн нарийвчилж, зарцуулагдах эрчим хүчний хангамжийг хүртэл шинээр дэд бүтэцжүүлэх болов уу?

Д.ЭНХБАТ