Арав хорин хүн амь насаа нэг өдөрт алдаж, шударга үнэнийг илчилсэн бүхэнд шоронгийн хаалга тачигнасан элдэв үймээнтэй эмгэнэлтэй цаг үе ирж, ороо бусгаа нийгмийн золиосонд олон хүн амьдралаараа хохирч байна. Төр засаг гэдэг ард түмнийг амгалан тайван, айх айдасгүй, идэх хоолтой өмсөх хувцастай, үр хүүхдээ өсгөн бойжуулах, хөлийг нь дөрөөнд хүргэх боломжийг олгодог үйлчилгээний байгууллага.

Гэтэл эрх ямба нь хэтэрч, эцсээ хүртэл дарангуйлах хүсэлтэй эрээ цээргүй өлөн бүлэглэлийн хар сүүдэр манай нийгмийг нөмөрсөн цагаас өрх гэр болгонд өөрийн гэсэн том жижиг асуудал хөвөрч, өтгөсөө үдэж, нялхсаа угтах эгэл жирийн амьдралын хэмнэл ч жирийн бус жигтэй, жихүүдэстэй болов.

Хэн нэг улс төрчийн нөлөөнд орж харийн коминтерн шиг аашилдаг хууль хяналттай ч болсон уу? Эрх ямбатай нь улс орноо зарж, эгэл жирийн ард түмэн үнэ цэнтэй бүхнээ барьцаанд тавиад ч маргаашийн найдвар маш муу.

Өр ширтэй, өлөн ходоодтой, өөдрөг хүсэл мөрөөдлөөс цаашгүй нэгэн хэвийн, нийтээрээ ядуу улс орон болов. Төрийн суудлыг наймаалцаж, түмний зовлонгоор зоолж сурсан засгийн эрхийг зайдалсан замбараагүй дээрэмчдийн бүлэглэл биднийг Манжийн дарлал шиг талхихад учир мэдэхгүй энхрий нялх үрсээ дахин яаж ийм гэрэл гэгээгүй нийгэмд хүн болгоно доо гэхээс элэг эмтэрнэ.

Д.ЭНХБАТ