Энэ сарын 22-ны өдөр МАХН-ын дэд дарга Э.Эрдэнэжамъяан мэдээлэл хийж прокурор Ё.Сагсайн хагас нүцгэн бичлэгийг дэлгэсэн байдаг. Уг бичлэгт Ё.Сагсай нь “Би энэ хүнийг хорихоос гаргахын тулд бүх зүйлийг хийх болно, бэлгийн дарамтанд оруулсан нь үнэн” гэх агуулга бүхий зүйлсийг хэлсэн нь бий. Үүний дараахан тэрээр МАХН-ын дэд дарга Э.Эрдэнэжамъяанг өөрийн нэр төрд халдсан гэж үзэн шүүхэд хандахаар болсноо илэрхийлсэн юм.

Ё.Сагсайн энэ тухай “Өдрийн сонин”-д өгсөн ярилцлагадаа:

“Нөхөр нь шоронд орсон эмэгтэйтэй албан тушаалаа ашиглаж, түүнд бэлгийн дарамт үзүүлж, дарамталсан асуудал ерөөсөө байхгүй. Ажил үүргийнхээ дагуу Н.Энхбаярыг шүүх хурал дээр түүний гэм буруугийн асуудлаар яллах үүргээ гүйцэтгэсэн. Гэтэл Н.Энхбаяр өөрийнхөө хийсэн гэм бурууг хүлээн зөвшөөрөхгүй, хилсээр хэлмэгдсэн мэтээр үзэж, түүнийг шүүсэн хүмүүсийг бүгдийг хууль завхруулагчид мэт болгож нийгэмд харагдуулах зорилгоор ийм зүйлийг зориуд санаатайгаар тарааж, нийгмийн тархийг угааж байна гэж би үзэж байна.

Тэр бичлэгийг хийсэн хүмүүс учрыг нь олж өгөх ёстой. Энэ бичлэг бол айлын гэрт болсон бичлэг. Намайг айлд согтуу байж байхад гаднаас гуч орчим насны хоёр залуу орж ирж хүч хэрэглэж айлган сүрдүүлж, дарамтлан рекет хийх замаар энэ бичлэгийг хууль бусаар хийсэн. Магадгүй энэ үйл ажиллагааг Н.Энхбаяр болон түүний хамсаатнууд зохион байгуулсан ч байж магадгүй гэж хардаж байна. Бичлэг хийсэн хоёр хүн, түүнийг зохион байгуулж байгаа хүмүүс намайг хууль бусаар мөрдөж мөшгөсөн байна. Энэ нь хууль бус үйлдэл. Бусдын орон байранд хууль бусаар нэвтэрч байгаа нь хууль зөрчсөн үйлдэл. Бусдын зөвшөөрөлгүйгээр иргэний орон байранд хууль бусаар нэвтрээд зогсохгүй дуу дүрсний бичлэг хийж байгаа үйлдэл нь ч өөрөө хууль бус. Би тэр үед Нийслэлийн прокурорын газрын хяналтын прокурор ажилтай байсан. 2009 оны долдугаар сарын сүүл наймдугаар сарын эхээр байсан санагдана. Ээлжийн амралтаа аваад амарч байхад таньдаг хүн утасдаж гэртээ урьсан юм. Үүний дагуу тэдний гэрт явж очсон. Намайг очиход цай, хоол бэлдсэн байсан, танил минь “Амралтаа авчихсан юм чинь амралтыг чинь ёсолъё” гэж архи задалж дайлсан. Намайг тэднийд согтуу байж байхад л гэнэт гэрэл чийдэн болоод л хоёр хүн орж ирээд л хашгирч дарамталж бичлэг хийсэн. Тухайн үед гэнэтийн үйл явдал болсон. Хоёр залуу орж ирж, шантаажилж, дарамталсан, айлгасан, би өөрөө согтуу байсан. Олон жилийн өмнө болсон явдал шүү дээ. Яг ямар үйл явдал болсныг би өнөөдөр тод санаж чадахгүй байна” гэсэн байна.