Хойд Америкийн Үндэсний сагсанбөмбөгийн холбоо “Бүх оддын тоглолт”-ын “Үнэ цэнэтэй тоглогч” /NBA All-Star MVP Award/-ийн шагналаа домогт сагсанбөмбөгч Коби Брайантын нэрэмжит болгохоор шийдвэрлэснийг ҮСБХ-ны комиссар Адам Силвер мэдээллэжээ.

Коби Брайант “Бүх оддын тоглолт”-од 18 удаа оролцож байсан бөгөөд энэ үзүүлэлтээрээ бүх цаг үеийн түүхэнд Карим Абдул Жаббарын дараа /19/ хоёрдугаарт бичигддэг юм.

А.Силвер “Коби Брайантын гэнэтийн үхэлтэй эвлэрч чадахгүй бөгөөд нэрийг нь мөнхжүүлэхийн тулд ямар нэг зүйл бодож олохоор хичээсний эцэст “Бүх оддын тоглолт”-ын шилдэг тоглогчийн шагналыг Кобигийн нэрэмжит болгохоор шийдвэрлэлээ” гэжээ.

ҮСБХ-ны “Бүх оддын тоглолт” энэ цаг мөчид Чикаго хотын спортын ордонд Жианнис Антетокумпо, Леброн Жеймсийн багуудын хооронд болж байгаа бөгөөд дууссаных нь дараа хамгийн шилдэг тоглогчид “Kobe Bryant MVP Award 2020” шагналыг гардуулна.

Эх сурвалж: У.Баярсайхан, mnb.mn