ОХУ-ын Зэвсэгт хүчин зургадугаар сарын 11-ний лхагва гаргийн шөнө (00:31–00:40, орон нутгийн цагаар) Харьков хотын Слободской болон Основянский дүүргүүд рүү Shahed төрлийн 17 дроноор цохилт өгсөн байна.

Урьдчилсан мэдээллээр, агаарын дайралтын улмаас хоёр хүн амиа алдаж, 54 хүн шархадсан бөгөөд тэдний дунд таван хүүхэд байгаа талаар тус хотын мэр Игорь Терехов Telegram хуудсаараа дамжуулан мэдээлжээ.

Тэрбээр “Таван давхар орон сууцанд дор хаяж 15 өрөө шатаж байна… Өөр нэг хаяг дээр нуранги дор хүн байж болзошгүй” хэмээн бичсэн байна. Мөн тэрбээр галд автсан байшингаас хэд хэдэн хүнийг аварч чадсан гэж нэмж дурджээ.

Цахилгаан түгээх сүлжээ устжээ

Хотын мэрийн хэлснээр, олон давхар болон хувийн орон сууц, хүүхдийн тоглоомын талбай, аж ахуйн нэгжүүд, нийтийн тээврийн хэрэгслүүд цохилтод өртсөн байна.

Олон машин шатаж, цонхууд хагарчээ. Троллейбус, цахилгаан дамжуулах шугам, нийтийн үйлчилгээний болон үйлдвэрлэлийн байгууламжууд эвдэрсэн байна.

Яаралтай тусламжийн алба, мөн сайн дурынхан халдлагын үр дагаврыг арилгаж, хийн хангамж, цахилгаан, усыг сэргээх ажил хийж байгаа талаар Терехов онцолжээ. Мөн "Харьков life" Telegram суваг шатаж буй барилгын бичлэгийг нийтэлжээ.

Үндэсний Цагдаагийн газар: ОХУ-ын Зэвсэгт хүчин Харьков хотыг агаараас бөмбөгджээ

Украины Үндэсний Цагдаагийн газраас мэдээлснээр, зургадугаар сарын 7-нд ОХУ-ын зэвсэгт хүчин Харьков хотод агаарын цохилт өгсөн байна.

Энэ нь тухайн өдөрт Харьков хотод хийгдсэн хоёр дахь агаарын халдлага байсан бөгөөд 2022 оны хоёрдугаар сараас эхэлсэн Оросын бүрэн хэмжээний довтолгооноос хойшхи хамгийн хүчтэй дайралтын нэг боллоо гэж тэмдэглэжээ.

Харьков хотын мэр Игорь Тереховын мэдээлснээр, хот руу нийт 48 ширхэг Shahed төрлийн дрон, хоёр пуужин, дөрвөн удирдлагатай агаарын бөмбөгөөр цохилт байна.

Тэрбээр хоёр талын мэдээллийг хараат бус эх сурвалжаар шууд шалгах боломжгүй байгааг ч онцолжээ.

Эх сурвалж: DW
Б.ЖАРГАЛ