1945 оны 10 дугаар сарын 20-нд БНМАУ Тусгаар тогтнолын төлөөх санал хураалт явагдсан билээ. Үүнтэй холбогдуулан ОХУ-аас Монгол Улсад суугаа элчин сайд А.Н.Евсиков "Эрхэм хүндэт Монгол анд найзууд аа!

Одоогоос яг 80 жилийн өмнө буюу 1945 оны 10-р сарын 20-нд Монгол Улсын тусгаар тогтнолын төлөөх санал хураалт орон даяар зохион байгуулагдсан ба Монголын ард түмэн уг арга хэмжээнд гайхамшигтай идэвхтэй буюу 98.47 хувийн ирцтэйгээр оролцсон билээ. Санал өгсөн 487,409 хүн бүр эх орныхоо тусгаар тогтнолын төлөө санал нэгтэйгээр “Тийм” гэж санал өгсөн.

Хэдийгээр Монголын хувь заяатай холбоотой шийдвэрийг Монголын ард иргэд өөрсдөө бие даан гаргасан боловч уг санал хураалтыг явуулах боломж нь Монголын үнэнч анд нөхөр болон хойд хөрш ЗХУ-ын дипломат хүчин чармайлтын ачаар бүрдсэн гэдгийг мартаж болохгүй билээ.

Тухайн үед Монгол Улсын бүрэн эрхт байдлыг хүлээн зөвшөөрч, тэр байтугай гартаа зэвсэг барин хамгаалж байсан цорын ганц улс нь ЗХУ байсан бөгөөд Монголын тусгаар тогтнолын тухай асуудлыг олон улсын тавцанд тогтмол тавьж, олон улсад хүлээн зөвшөөрүүлэхийн төлөө тууштай ажиллаж байв.

Бүх ард түмний санал хураалт, улмаар Монгол Улсыг дэлхийн бусад улс гүрнүүд хүлээн зөвшөөрсөн явдал нь тус улсыг дэлхийн улс төрийн шинэ түвшинд гарч ирэхэд хувь нэмэр оруулж, жинхэнэ тусгаар тогтнол, улмаар НҮБ-ын бүрэн эрхт гишүүнчлэлд хүрэхэд чухал алхам болсон юм.

Энэхүү завшааныг ашиглан найрсаг Монголын ард түмэнд тогтвортой хөгжил дэвшлийн түлхүүр болох эв нэгдлээ сахин хамгаалахыг хүсэн ерөөе. Монгол Улс нь хөгжил цэцэглэлтийн асар их нөөц боломжтой билээ. Мөн түүнчлэн өнгөрснөө санаж, хүндэтгэхгүйгээр урагшилж, ирээдүйгээ бүтээх аргагүй билээ." гэжээ.