Анх байгуулагдсан цагаасаа хойш бүрэлдэхүүнээ огт өөрчлөлгүй бүтэн гучныг үдэхдээ өнөөг хүртэл тасралтгүй уран бүтээлээ туурвисаар яваа “Харанга”-ынхан “Зөвхөн Монголдоо”, “Амьдрал”, “Толин хул”, “Энэ бол дурлал биш”, “Үгүйлэн санана” дуунуудаараа Төрийн шагнал хүртсэн нь оны сүүлийн баярт мэдээний нэг байв. Төрийн шагнал хүртсэн бүтээлүүдийн нэг “Үгүйлэн санана” дууны шүлгийг бичсэн яруу найрагч С.Оюун “Гучаад жилийн тэртээ бичсэн "Үгүйлэн санана даа" дуу минь төрийн шагнал хүртлээ. Залуу насандаа мөргөе. Сонины тасархай дээрээс олоод дуу бүтээсэн тэр өдрийн тэнгэр Чукадаа мэхийн хүндэтгэе. “Харанга” хамтлаг, дуулсан Лхагвасүрэндээ, тэнгэрт буй аав ээждээ, үр хүүхэд, ач зээ нартаа, ачит багш нартаа уран бүтээлч нөхдөдөө намайг хайрлан хүндэтгэж талархал илэрхийлсээр буй бүх хүнд мэхийн ёсолж байна” гэж өөрийн нүүр номондоо бичжээ. Ямар хэлсэн эзэн шигээ даруухан, эгэлгүй их хүндэтгэл вэ.

Тийм ээ, яг энэ цаг дор та бус, яруу найрагч С.Оюун танд монгол түмэн мэхийн ёсолж байна. Хол газар хилийн дээсэн дээгүүр ч, хоёр сэтгэл бие биеэ үгүйлэн хайдаг тэр их хайрыг бидэнд ойлгуулж өгсний тань төлөө, сар нарыг унтуулан сэрээж бодогддог санахын жаргалтай тарчлаант өдрүүдийг дуулж өгснийх нь төлөө С.Оюун найрагч болоод алдарт “Харанга” хамтлагийнханд мэхийн ёсольё. Өнөөдөр танд тоймгүй олон хүн тоолшгүй их баяр хүргэж байгаа байх. Энэ нь ч зүй ёсны юм. Та чинь Монгол киноны түүхэнд сувдан шигтгээ болж мөнхөрсөн хүнлэг сэтгэлийн эгшиглэнт аялгуу "Тан руу нүүж явна" кино, "Үгүйлэн санана даа", "Үнсье чамайгаа", "Хорвоод ганцхан ээж" зэрэг ардын дуу мэт аманд аялагдсан шилдэг дуунуудыг бичсэн хүн шүү дээ.

...Томоогүй явж боллоо, ээж ээ
Тогоруу буцаж, зэгс шаргалтлаа
Хорвоод намар ирдгийг мартсан
Хонгор хүүгээ уучлаач ээжээ... гэдэг дөрвөн мөртийг хоолой нь сааралтахгүй дуулдаг хүн хорвоод биш юм аа гэхэд Монголд үгүй биз ээ. Эмчийн тангараг өргөсөн хүн яруу эгшигт урваж, хүний сэтгэлийг хөнгөн бийрээр хөвсөлзүүлэх шидэд автаж, өрөөлийн зовлон шаналлыг өөрийнх мэт үүрч дүүрч явахад юу эсийг үзэж туулсан байхав. Гэвч та “Их мөрөн дөлгөөн, эрдэмтэй хүн даруу”-гийн үлгэр жишээг үзүүлж амьдарсан нь гайхамшиг.

Таны тухай яруу найрагч Р.Эмүжин “"Тань руу нүүж явна" уран сайхны киноны ээж..."Үгүйлэн санана" дууны үнэн хайр, "Хорвоод ганцхан ээждээ"-гийн хүний л гэнэн үр...олон арван жилийн туршид монгол хүн бүрийн сэтгэл зүрхний нэгээхэн хэсэг, санахуй хайрлахуйн ихээхэн учиг болсон энэ гайхам бүтээлүүдийг яруу найрагч, зохиолч С.Оюун төрүүлсэн. Гайхалтай байгаа биз. Урсаад л байгаа ус мэт, ургаад л байгаа өвс мэт тийм л намуухан уянга, намбатай аялгуу..."Загвар өмсөгч", "Домогт хүрэн халзан" тууж романууд мөн л түүнийх. Нулимс, хайр, хагацал, хүсэл хийгээд хясал...энэ бүхнийг өгүүлэхдээ алганы хээ мэт аяар аяар чимээлдэг С.Оюун найрагч...Омог нь ихдэж олз бүтээл нь хомсодсон, сүр нь ихдэж сүүтэй бүтээл нь ховордсон зохиолч, яруу найрагчид байдаг л юм. Харин С.Оюун эгч өөр. Тэр өөрөө Монголын их утга зохиолын нулимс, сүү, хайр, бас гэрэл...Тэр хэзээ ч хашгирдаггүй, гоцолдоггүй. Би энд байна гэж бэлчээрээ нэрлэдэггүй. Тэгэхдээ хүн болгон дэргэд нь саатаж, цэнгэг уснаас нь цангаа тайлан, сэтгэлийн чилээ гаргах үгсийг чимээлэн хэлэлцдэг амин булаг шиг л санагддаг” хэмээжээ. Урсаад л байгаа ус мэт, ургаад л байгаа өвс мэт тийм л намуухан уянга, намбатай аялгуу. Гайхалтай тодорхойлолт. Үүн дээр ямар нэг нэмэлт тайлбар огт хэрэггүй. Тэгээд ч М.Горькийн нэрэмжит утга зохиолын дээд сургууль төгссөн уран бүтээлчтэй юу ярих вэ. Зүгээр л таны зохиосон, түмэн олондоо түгж, төрийн шагнал хүртсэн “Үгүйлэн санана” дууны үгийг хүргэж байна.

Санана даа чи намайг санана

Сар нарыг унтуулан сэрээж санана

Нартайд чи намайг санаж гандана

Сартайд чи намайг санаж бүдэрнэ

Үгүйлнэ дээ чи намайг үгүйлнэ

Үдэш унтавч зүүдэндээ үгүйлнэ

Өглөө босоод харцандаа үгүйлнэ

Өр зүрх чинь намайг үгүйлнэ

Би хаа ч явсан үргэлж чамтай

Сэтгэл зүрхэнд минь чи дандаа хамтдаа

Чи хаа ч гэсэн үргэлж надтай

Хоёр сэтгэл тэмүүлэн бие биенээ хайна

Хүснэ дээ чи намайг хүснэ

Хүнийг хэлэлтгүй би өөрөө хүснэ

Хол газар хилийн дээсэн дээгүүр

Хоёр сэтгэл үгүйлэн бие биенээ хайна

Аядуу намуухан яваад ард түмэндээ үнэлэгдсэн Монгол Улсын соёлын гавьяат зүтгэлтэн эрхэм найрагч танд эрүүл энх, саруул сайхныг хүсье.