Найр наадам улирч, завгүй намар айлчилсан Монголд хөл ихтэй амьдрал буцална. Энэ жил коронавирустэй холбоотойгоор улсын наадам болох эсэх тодорхойгүй байсан ч улалмжлал болон жил бүр хийдэг төрийн их баяр цэнгэл наадмаа өнжилгүй хийсэн билээ. Өнгөрсөн жилийн наадмаас дараа жилийн наадмыг хүртэл хэл амаар тасардаггүй мөнхийн сэдэв бол Монгол үндэсний бөхийн допингийн асуудал. Үеийн үед допингтой тэмцэж ирсэн гэж цаасан дээр л зүйл заалт нэмэхээс энэ асуудалтай тууштай тэмцсэн түүх бидэнд байхгүй, олсон гавьяа ч тэр.

Үндэсний өв соёл шингэсэн уг спортоо залуу үедээ сурталчлах шаардлага бидэнд бий. Үгүй бол бөх шимтэн үздэг шинэ үегүй болох аюулын харанга дэлдэхэд тун ойрхон байна. Энэ нь бөхчүүдийн допингийн хэрэглээтэй шууд холбоотой. Залуус дэлхийн спортыг үзэж, дэлхийн стандартын талаарх ойлголт маш сайн болсон. Допингийн тухайд бол ярих ч юм биш, хар данс. Жилийн жилд энэ хэл ам, хэрүүл шуугианаасаа салахгүй байгаа ийм нөхцөлд залуус үндэсний бөхөө сонирхох нь битгий хэл жигших хандлага үзүүлж болно.

Өнгөрсөн жилийн бөхчүүдийн допингийн шинжилгээний хариуг наадам дуусав уу үгүй юу шөвгийн бөхчүүд бүгд өөрсдийн талаарх хариуг цахим орчиндоо дэлгэн олонд хүргэсэн. Гэтэл энэ жилийн тухайд шинжилгээний дүн мэдээ өдийг хүртэл тодорхойгүй байгаа нь нь олны хардлагыг төрүүлээд байгаа юм. Мөн адил луйвар, хэл ам дагуулж яваа юм биш биз? Өнө эртнээс бөхөө дээдэлдэг, шимтэн үздэг түүхтэй Монголчууд допинг гэх энэ хар сэдвээс залхаж байна. Монгол бөхийн зүлэг ногоон дэвжээ үеийн үед ариун байг гэх энэ үг зүгээр ч нэг ерөөл биш чин хүсэл бололтой.