Хадгаламжийн хэмжээ гурав дахин өсжээ

УИХ-ын гишүүн Т.Энхтүвшингийн орлого өнгөрсөн жил 37 сая байсан бол 2021 онд 115 сая болж өссөн байна. Гэр бүлийнх нь гишүүний орлого 19 саяас мөн л 79 сая болж өсжээ. 677 сая төгрөгөөр үнэлэгдэх үл хөдлөх хөрөнгөтэй. 134 сая төгрөгийн үнэ бүхий Toyota, LEXUS RX330- 1, Lexus, 570- 1 автомашинтай. Энэ жил хөрөнгийн хэмжээ өөрчлөгдөөгүй. Харин хурдан удмын 27 адуутай байсан бол энэ жил 36 адуутай хэмээн мэдүүлж, түүнийгээ 99 саяар үнэлжээ. 2020 онд 126 сая төгрөгийн хадгаламжтай байсан бол 360 сая төгрөгийн хадгаламжтай болж өсжээ. 25 сая төгрөгийн үнэт эдлэлтэй. Бурхант тал ХХК-ийн 50 хувийг эзэмшдэг байна.

212 сая төгрөгийн зээлтэй

Г.Ганболд гишүүн 2020 онд 34 сая төгрөгийн орлого хэмээн мэдүүлж байв. Харин энэ удаа түүний орлого 99 сая төгрөг болж өссөн байна. Гэр бүлийн гишүүдийн орлого байхгүй гэж мэдүүлж байсан бол энэ жил 35 сая төгрөг олсон гэж мэдүүлэв. 263 сая төгрөгийн үл хөдлөх хөрөнгө, 20 сая төгрөгийн үнэ бүхий газартай. Toyota, Corolla runx-1, Toyota, Land Cruiser 200-1 автомашинтай. Түүнийгээ 212 сая төгрөгөөр үнэлжээ. 23 сая төгрөгийн үнэт эдлэлтэй бол 212 сая төгрөгийн зээлтэй гэж мэдүүлсэн нь өөрчлөгдөөгүй байна.

Орлого нь өсөж, 240 сая төгрөгийн зээлээ төлжээ

Ц.Мөнхцэцэг гишүүний жилийн орлого өсжээ. Тэрбээр өнгөрсөн жил нь 15 сая, гэр бүлийн гишүүдийнх нь 23 сая төгрөгийн орлоготой гэж мэдүүлж байсан бол 2021 онд 46 сая, 57 сая/гэр бүл/ орлого олжээ. 810 сая төгрөгийн үл хөдлөх хөрөнгөтэй, тусгай зориулалтын нэг автомашинтай гэж мэдүүлжээ. 290 сая төгрөгийн зээлтэй байсан бол энэ удаа 50 сая төгрөгийн зээлтэй гэж мэдүүлэв. 240 сая төгрөгийн зээлээ барагдуулсан байна. Мон эдутейнмент ХХК-д хувь эзэмшдэг.

Түүний орлого дөрөв дахин нэмэгдэв

УИХ-ын гишүүн Н.Ганибалын жилийн орлого энэ удаа огцом өсөв. Тэрбээр өнгөрсөн жил 89 сая, гэр бүлийн гишүүдийнх нь 76 сая төгрөг олсон гэж мэдүүлж байв. Тэгвэл 2021 онд түүний орлого 384 сая болж өсжээ. Гэр бүлийн гишүүд нь 74 сая төгрөгийн орлого олсон байна. 622 сая төгрөгийн үл хөдлөх хөрөнгөтэй. 45 сая төгрөгийн Nissan, Qashqai маркийн автомашинтай. Мөн тэрбээр өнгөрсөн удаа 36 сая төгрөгийн хадгаламжтай гэж мэдүүлсэн бол энэ жил 103 сая, авлагын хэмжээ ч 360 сая төгрөг болж нэмэгджээ. МОСМЕП ХХК, Ардчилал таймс сонинд хувь эзэмшдэг.

69 сая төгрөгийн хадгаламжтай болжээ

Б.Энхбаяр гишүүний жилийн орлого 21 сая төгрөг байсан бол 50 сая болж нэмэгджээ. Гэр бүлийн гишүүдийнх нь 30 сая төгрөг байна. 160 сая төгрөгийн үл хөдлөх хөрөнгөтэй бол 80 сая төгрөгийн Toyota, Land Cruiser 200 маркийн автомашинтай байна. 10 сая төгрөгийн газар, 69 сая төгрөгийн хадгаламж, ямар нэгэн компанид хувь эзэмшдэггүй хэмээн мэдүүлэв.

Орлогын хэмжээ 369 саяас 99 сая болж буурчээ

УИХ-ын гишүүн Ж.Батжаргалын жилийн орлого өмнөх онд 369 сая төгрөг байсан бол энэ жил 99 сая төгрөг болж буурчээ. Харин гэр бүлийн гишүүдийнх нь 52 сая төгрөгөөс 89 сая болж өссөн үзүүлэлттэй байна. Үл хөдлөх хөрөнгийн үнэлгээ 160 сая төгрөгөөс 110 сая болж бууруулж мэдүүлжээ. Тээврийн хэрэгсэлгүй. Хадгаламжийн хэмжээ өмнөх онд 10 сая байсан бол энэ жил 36 сая төгрөгийн хадгаламжтай гэж мэдүүлжээ.

Орлого буурсан ч хөрөнгө нь нэмэгдэв

Г.Дамдинням гишүүн 2020 онд жилийн орлогоо 726 сая төгрөг гэж мэдүүлж байв. Харин 2021 онд 43 сая төгрөгийн орлого олжээ. Харин гэр бүлийн гишүүдийн орлого 733 сая төгрөг болж өсөв. 615 сая төгрөгийн үл хөдлөх хөрөнгөтэй байсан бол 769 сая төгрөг болж нэмэгджээ. Үнэт эдлэлийн хэмжээ мөн 480 саяас 595 сая болж нэмэгдсэн байна. Тээврийн хэрэгсэл, мал аж ахуй, газаргүй. Гадаадын банк санхүүгийн байгууллагад 185 сая төгрөгийн хадгаламжтай бол дотоодын банкинд 85 сая төгрөгийн хадгаламжтай. Топ майнинг солюшнс ХХК, Марка коиба ХХК-д хувь эзэмшдэг.

Автомашингүй болжээ

С.Одонтуяа гишүүний жилийн орлого 169 сая төгрөг байсан бол энэ удаа 65 сая төгрөгийн орлого олсон гэж мэдүүлжээ. Гэр бүлийн гишүүний орлого нь мөн 37 саяас 12 сая болж буурсан байна. 798 сая төгрөгөөр үнэлэгдэх үл хөдлөх хөрөнгөтэй.Өнгөрсөн жил Камаз маркийн автомашинтай гэж мэдүүлсэн бол энэ удаа автомашингүй гэж мэдүүлэв. Газар, мал аж ахуй, үнэт эдлэл, хадгаламж байхгүй. 288 сая төгрөгийн зээлтэй. Сентоза фоод корт ХХК-д хувь эзэмшдэг.

229 сая төгрөгийн зээлтэй гэж мэдүүлжээ

Ц.Сандаг-Очир гишүүн 200 сая төгрөгийн жилийн орлоготой байв. Харин 2021 онд 49 сая болтлоо буурчээ. Гэр бүлийн гишүүдийнх нь мөн адил буурсан үзүүлэлттэй байна. 511 сая төгрөгийн үл хөдлөх хөрөнгөтэй. 37 сая төгрөгийн мал аж ахуй. Гурван сая төгрөгийн газар, 1.8 сая төгрөгийн үнэт эдлэлтэй. 45 сая төгрөгийн хадгаламжтай бол 229 сая төгрөгийн зээлтэй гэж мэдүүлсэн энэ жил ч өөрчлөгдсөнгүй.

АПУ компанийн хувьцааг авчээ

УИХ-ын гишүүн Х.Ганхуяг гишүүний орлого энэ жил буурч орж иржээ. Тэрбээр 2020 онд 499 сая төгрөгийн орлоготой, гэр бүлийн гишүүд нь 113 сая төгрөг олсон гэж мэдүүлсэн бол 2021 онд 92 сая төгрөг, гэр бүлийн гишүүд нь 688 сая төгрөг олсон гэж мэдүүлэв. Гурван тэрбум төгрөгийн үл хөдлөх хөрөнгөтэй. 130 сая төгрөгөөр үнэлэгдэх RangeRover автомашинтай. 45 сая төгрөгийн газартай бол 477 сая төгрөгийн үнэт эдлэлтэй байна. 40 сая төгрөгийн хадгаламжтай бол нэг тэрбум төгрөгийн авлагатай. Харин түүний зээлийн хэмжээ 539 сая болж нэмэгджээ. Сонголожистик ХХК, Даунтаун фейшн ХХК, Хера Экуйпмент ХХК, Ремикон ХК, ремикон цемент шохой ХХК, Мон аяут ХХК, Женерал индастриал солюшн ХХК хувь эзэмшиж байсан бол энэ жил АПУ ХК нэмэгджээ.