Өнөөдөр дэлхийн гурван хүн тутмын нэг нь нүдний хараа муутай байдгийг судалгаагаар тогтоожээ. Хүний нүдний хараа муудахад ихээхэн нөлөөлж буй хүчин зүйлсийн нэг нь компьютер. Иймд нүдээ хамгаалах, хараа муудахаас сэргийлдэг, хараа тогтоодог комплекс дасгалуудыг байнга хийж сурах нь хамгийн ухаалаг шийдэл болохыг зөвлөжээ. Дасгалуудыг өдөрт хоёроос цөөнгүй удаа болон хослуулж хийвэл илүү үр дүнд хүрэх ажээ. Нүдний хараа сайжруулах доорхи дасгалуудыг та өдөр цайныхаа цагаар, орой ажил тараад хийгээд үзээрэй.

Хараа сайжруулах цогц дасгалууд

Нүдээ баруун зүүн, тийш, дээш доош нь хөдөлгөнө. Нар зөв болон нар буруу эргэлдүүлнэ. Нүдээ хурдан, эрчимтэй анивч. Зүүн доод булан руугаа хараад шууд дээшээ эгцлэн харна. Дараа нь нөгөө талдаа давтана. Нүдээ хооронд нь ойртуулна. Ойр ойрхон анивчих. Оффисынхоо цонхонд дөхөж очоод эхлээд цонхон дээрх жижиг зураас, эсвэл ойр байгаа зүйлийг ширтээд дараа нь харцаа алсад байгаа байр, уул гэх мэт зүйлс рүү шилжүүлнэ. Нэг дасгалыг 6-аас доошгүй удаа давтана.

Холын хараа муудахаас сэргийлэх цогц дасгал

Сандлын түшлэгийг налан хойшлохдоо амьсгаа аваад, урагш тонгойхдоо амьсгаагаа гаргана. Сандлынхаа түшлэгийг налаад, нүдээ чанга аниад, дараа нь нээнэ. Гараа ташаандаа аваад, толгойгоо баруун тийш эргүүлээд, баруун тохойгоо харна. Дараа нь зүүн талдаа давтана. Дээш хараад, нүдээ нар зөв болон буруу эргэлдүүлнэ. Гараа урагш сунгаад, хурууныхаа үзүүрийг ширтэнэ. Гараа дээш өргөхдөө амьсгаа аваад толгойгоо өргөлгүйгээр хурууны хөдөлгөөнийг дагуулан харна. Гараа буулгахдаа амьсгаагаа гаргана. Энэ цогц дасгалыг компьютерийн ард 40-50 минут ажилласны дараа тогтмол хийж байх нь сайн. Дасгалыг хийх хугацаа 3-5 минут.

Нүдний массаж

Нүдээ аниад долоовор болон дунд хуруугаараа даран наймын тоо хэлбэртэй хөдөлгөөн, иллэг хийх нь нүдний цусны эргэлт, мэдрэлд сайн нөлөө үзүүлдэг. Ухархайн доод хэсэгт хөдөлгөөн нь хамар руу чиглэсэн, дээд хэсэгт нь хөмсөгний дээгүүр. Дасгалыг 8-16 удаа давтана.

Э.ЭГШИГЛЭН