Намар болохоор гуниг төрдөг. Байгалийн жамын энэ гуниг нэг бодлын сайхан байж. Навчис шаргалтаж ганц нэгээрээ унаад л. Хадлан тариагаа авч, мал сүрэг таргалаад, алим жимс багсайсан мөн ч сайхан улирал даа. Оюутан, сурагчид төв суурин газраа одсон болохоор гэр, хот ханхайж чимээгүйтээд жаахан гунигтай л даа. Үхэр мал бэлчээртээ оройтож, саран тэргэл шөнө хурааж явахад тэрэн шиг амгалан сайхан зүйлгүй. Монголын намрын ийм сайхан зүйлүүд өнөө сэтгэл дотроос ч сарнин оджээ. Намрын тэнгэрийн намуухан дулаахан, навчсын зөөлөн газардах шаргал гуниг бүх юм одоо сааралтсан юм шиг санагдах нь энэ л цагийн аяс биз ээ.

Шаргал сайхан бүхнийг одоо бодвоос жаргал гэж ойлговоос зохилтой байж. Одоо гэтэл бүх зүйл саарал. Утаа униарын эсрэг улсын Засгийн газраасаа өгсүүлээд Улаанбаатарын удирдлагууд хүртэл тэмцдэг баатрууд болж түүхий нүүрс нийслэлд оруулахгүй гэлээ. Хоёр зуун хорин мянган өрх гэр хороололд аж төрдөг. Нэг айл дунджаар дөрвөөс таван ам бүлтэй гэвэл найман зуу, есөн зуу мянган хүн болно. Хамгийн гунигтай нь өдий тооны иргэдийг хөлдөөд үх гэж байгаа юм шиг шийдвэр бол тэр түүхий нүүрс хот руу оруулахгүй байх шүү дээ. За, тэгтэл түүхий нүүрснээс аюултай нэг юм гарч ирлээ. Нөгөө жигтэйхэн их мөнгө төгрөгөөр хийгээд байсан шахмал түлш ёстой жинхэнэ гай болов оо. Энэ намрын шаргал гунигийг жинхэнэ сааралтуулсан зүйл энэ болсон. Хэчнээн ч хүн эрүүл мэнд, амь насаараа хохиров доо.

Үүгээр монголчуудын гуниг төгсгөл болсоон гэвэл сэтгэлд магадгүй амар амгалан байх сан. Гэтэл, хүний амьдрал зовлонгоор мөнхөд амьсгалдаг орчил санжээ. Саарал утааг дагасан саарал гунигаа мартагнаж амжаагүй байтал “Саарал жагсаалт” гэх аймшигт мангас гарч ирэв. Энэ намрын эхний гуниг энэ биеийг сульдаасан гуниг байв. Энхрий хайртаасаа салсан хүн ч гиюүрэн гуньдаг тийм л хувь бодьхон гуниг байв. Удаахь уйтгар гуниг Улаанбаатарын утаа болоод угаар, агаар дутсан гуниг байв. Гутгаар гуниг минь улс Монголоо алдсан мэт уушги зүрх сугалсан тийм л хүнд гуниг байв. Энэ намрын гунигийг би шаргалхан гэж бодож байсан чинь эдүгээ саарлаас саарал болоод цээж хөндүүрлүүлээд байна аа.