Японы мэргэжлийн сумо бөхийн 69 дэх их аварга Хакүхо М.Даваажаргалын нэрэмжит “Хакүхо кап” олон улсын сумо бөхийн аварга шалгаруулах 16 дахь удаагийн тэмцээн Японы Токио хотын “Тоёота Арена”-д маргааш эхэлнэ.

Хоёр өдөр үргэлжлэх тус тэмцээнд манай улсаас өсвөрийн таван тамирчин оролцохоор арлын Японыг өчигдөр зорив. Тодруулбал, 9 насны ангилалд 33 дугаар сургуулийн сурагч У.Эрдэнэдалай, 10 насанд Баянхонгор аймгийн Д.Дүүрэнсаран, 11 насанд Баянхонгорын Ц.Хишигбаяр, 12 насанд Хөвсгөлийн Н.Сүнгэрэл, 13-15 насанд нийслэлийн 115 дугаар сургуулийн сурагч Р.Дэлгэрмөрөн нар дасгалжуулагч Г.Наранбатын удирдлагад оролцоно. Энэ удаагийн тэмцээн анх удаа эмэгтэйчүүд болон насанд хүрэгчдийн ангилал нэмэгдсэнээрээ онцлогтой бөхөөд зөвхөн Японы бөхчүүд л уг ангилалд барилдах аж. Өсвөрийн сумо бөхийн тэмцээнд 20 орчим орны 1000 гаруй бөх оролцохоор мэдүүлэг өгчээ.

Ташрамд дурдахад, өнгөрсөн жилийн тэмцээнд 15 орны 1000 өсвөрийн сумоч барилдаж байсан юм.

Эх сурвалж: "Монцамэ агентлаг"