Монголбанкны Мөнгөний бодлогын зөвлөл ирэх даваа гариг буюу долдугаар сарын 7-нд хуралдаж, тэтгэвэр барьцаалсан зээлийн асуудлыг хэлэлцэхээр тогтжээ. Төв банкны ерөнхийлөгч Б.Лхагвасүрэн хэлэхдээ тэтгэврийн зээлийг хэрэглээний зээлийн ангиллаас гаргах байдлаар асуудлыг шийдвэрлэх боломжтойг хэлжээ.

Тэрбээр “Тэтгэврийн зээлд тавьсан 50:50 өр, орлогын харьцаа бол хэрэглээний зээл дээр тавигдаж байгаа стандарт. 2024 оноос хэрэгжиж байгаа стандарт юм. Тэтгэврийн зээлд тавьсан 50:50 өр, орлогын харьцаа хатуу байна гэж үзэж буй бол банк өөрөө шийдвэрээ гаргаж болох юм. Тэтгэврийн зээлийг хэрэглээний зээлийн ангиллаас гаргая гэдэг байдлаар асуудлыг шийдвэрлэж болох юм.

Ирэх Даваа гаригт Монголбанкны Мөнгөний бодлогын зөвлөл хуралдана. Ерөнхий сайд болон Гэр бүл хөдөлмөр нийгмийн хамгааллын сайд нартай өнөөдөр /2025.07.03/ уулзсан. Ерөнхий сайд ахмадуудын тавьж байгаа тэтгэврийн зээлтэй холбоотой асуудлыг судал гэсэн” гэжээ.

Монголбанкны Мөнгөний бодлогын зөвлөл өнгөрсөн зургадугаар сард хуралдаж, тэтгэврийн зээлд тавьж байсан өр, орлогын харьцааг 50:50 болгосон. Гэвч ахмад настнууд дахин зөөлрүүлэх шаардлага тавьсан тул ийнхүү дахин энэ асуудлыг хэлэлцэхээр төлөвлөсөн байна.

Өнөөдрийн байдлаар тэтгэврийн зээлд тавьсан өр, орлогын харьцаа 50:50 нөхцөлд ахмад настан тэтгэврээ барьцаалж зээл авахад тэтгэврийнхээ 50 хувийг зээлд, 50 хувийг нь амьжиргаагаа залгуулах эх үүсвэр болгож гар дээр нь үлдээх болж буй аж.

Монголбанкны ерөнхийлөгч Б.Лхагвасүрэн өмнө нь "Бага тэтгэвэр буюу сард 650 мянган төгрөгийн тэтгэвэр авдаг ахмад настны хувьд өмнө нь тэтгэвэр барьцаалсан зээл аваагүй тохиолдолд 4.5 сая төгрөгийн зээл авах боломж бий болсон. Энэ нь өмнө гаргасан журмаас зөөлөрсөн буюу 2.2 сая төгрөгийн тэтгэврийн зээл олддог байсантай харьцуулахад хоёр дахин өссөн үзүүлэлт" гэж мэдэгдэж байв.

Харин ахмадууд “50:50 харьцааг зөөлрүүлэхгүй бол өмнө нь тэтгэврээ барьцаалж зээл авсан ахмадуудын хувьд нэмж зээл авах боломж олдохгүй байна. Мөн бизнес эрхэлье гэхэд өндөр зээл авах шаардлага үүсдэг. Иймээс тэтгэврээ 100 хувь, болохгүй бол 70 хувь хүртэл барьцаалж гурван жилээр зээл авах шаардлага байна” хэмээн байр сууриа илэрхийлцгээсэн билээ.

Б.ЖАРГАЛ