Монгол Улсын Ерөнхий сайд Г.Занданшатар Дорноговь аймгийн Замын-Үүд сумын 800 гаруй иргэнтэй өчигдөр уулзлаа.

Тус сумын газрын асуудал тулгамдсан асуудлын нэг болоод байна. Суманд газар өмчлөл хаалттай байна гэж иргэд шүүмжлэв. Эзэмших хэлбэрээр газрын зөвшөөрөл гаргуулья гэсэн ч хүртээмжгүй байгааг хэлэв.

Ерөнхий сайд Г.Занданшатар газартай холбоотой иргэдийн санал хүсэлтийг үндэслэж, Замын-Үүд сумын хэмжээнд газар олгохыг шалгуулахаар АТГ, ЦЕГ, ТЕГ-ын хамтарсан ажлын хэсэг байгуулахаар шийдэв. Ажлын хэсгийг ирэх 7 хоногт Замын Үүдэд ажиллуулахаар боллоо.

Мөн хил, гаалийнхны уялдаа холбоогүй байдлыг цэгцлэх үүднээс хяналтын тогтолцоог нэгдмэл удирдлагатай болгох тал дээр Засгийн газар анхаарч ажиллана гэсэн Ерөнхий сайдын байр суурийг Замын-Үүд сумын иргэд талархан хүлээн авлаа.

Ерөнхий сайд Замын-Үүдэд цэгцрэх хөдөлгөөн өрнүүлж, хил, гааль, чөлөөт бүсийн уялдаа холбоог сайжруулж байж авлигын эрсдлийг бууруулна. Үүний эхлэл болгож сумын газар олголтыг эргэж харах, бүртгэлийг цэгцлэх ажлыг нэн даруй хэрэгжүүлнэ. Энэ бол Замын-Үүд сум цэгцрэх хөдөлгөөн юм.

Зорчигч болон ачаа тээврийн үйлчилгээ эрхэлж буй жолооч нарт татвар ногдуулахдаа хөдөлмөрийн хөлсний доод хэмжээг үндэслэж хувь хэмжээ тогтоож буйг эргэж харахыг тэдний төлөөлөл хүслээ. Хөдөлмөрийн хөлсний доод хэмжээ нэмэгдэхээр татвар хураамж дагаад өсч, дарамт болж буйг хэлэв.

Жолооч нарт ногдуулсан татварын хувь хэмжээг 30 хувь болгож бууруулсан төдийгүй татварын шатлалыг үгүй болгосон тогтоолыг аймгийн ИТХ баталсан. Харин тогтоол албажих үйл явц холбогдох яаманд гацаад байсныг шинэ оны босгон дээр гацаанаас гаргасан гэж Ерөнхий сайд мэдээлэв.

Ерөнхий сайд маргааш Дорноговь аймгийн төвд ажиллана.