Ардчилсан намын Үндэсний бодлогын хороо/ҮБХ/-ны хурал өнөөдөр /2025.08.31/ үргэлжлүүлэн хуралдаж, намын даргад нэр дэвшигчдийн асуудлыг хэлэлцэнэ.

Энэ сунгаанд УИХ-ын гишүүн, УИХ-ын дэд дарга Б.Пүрэвдорж, УИХ-ын гишүүн, УИХ дахь Ардчилсан намын бүлгийн дарга О.Цогтгэрэл, УИХ-ын гишүүн Ж.Баярмаа, Ардчилсан намын Үндэсний бодлогын хорооны гишүүн Б.Отгонбат нар өрсөлдөж байна.

ҮБХ нь нийт 380 гаруй гишүүнтэй, тэднээс хамгийн олон санал авсан өрсөлдөгч Ардчилсан намын даргаар сонгогдох учиртай. Нэр дэвшигчдийн дунд өчигдөр мэтгэлцээн зохион байгууллаа.

Нэр дэвшигчид Ардчилсан намын даргаар сонгогдвол ямар бодлого дэвшүүлж ажиллан ялалт хүргэх вэ гэдгээ ийн тодорхойллоо. УИХ-ын дэд дарга Б.Пүрэвдорж “Би эх орныхоо 160 гаруй суманд очиж ажиллаад байна. Зөвхөн сонгогдсон тойргийнхоо төдийгүй Монгол Улсынхаа бүх иргэдийн хүсэл зоригийн төлөө ажилладаг. Өнгөрсөн парламентын хамгийн олон хууль тогтоол батлуулсан гишүүний хувьд надад Ардчилсан намыг ялуулах туршлага бий" гэв.

УИХ дахь Ардчилсан намын бүлгийн дарга О.Цогтгэрэл "Ардчилсан нам манлайллын стратегийг хэрэгжүүлнэ. Миний хувьд систем бүтээж ялалт авч ирэхийн төлөө бодлогоо хэрэгжүүлнэ" гэж бодлогоо тодорхойлсон.

УИХ-ын гишүүн Ж.Баярмаа “Бид бүгдийн давуу талууд нийлж байж Ардчилсан намыг ялалтад хүргэнэ. Бодлогын судалгааны хүрээлэнд бид ач холбогдол өгч байх ёстой. Улстөрч хүн бодлоготон, үзэл санаандаа үнэнч, алсын хараатай, үнэт зүйлсээ хэрэгжүүлэх тууштай хүн байх ёстой. Миний хувьд энэ зарчмын төлөө ажиллаж чадна. “Зориг” үгүй бол манлайлал үгүй. Няцашгүй чанар надад бий" гэв.

Б.Отгонбат "Судалгаанд суурилсан хөгжлийн бодлого, өрсөлдөх чадвараа тооцоолж Монгол Улсдаа өөрчлөлт авч ирнэ. Миний давуу тал “Дэлхийтэй харилцах”. Тиймээс гадаадын хөрөнгө оруулалт татсан, итгэл татсан Монголын төлөө бодлогоо хэрэгжүүлнэ. Бид бүгдээрээ хамтран ажиллажАардчилсан намыг дахин сэргээнэ" гэж мэдэгдээд буй.