НББХ: Хөдөлмөрийн тухай хуулийн шинэчилсэн найруулгын төслийн анхны хэлэлцүүлгийг хийж дуусгалаа

Aдмин / Хууль

Улсын Их Хурлын Нийгмийн бодлогын байнгын хорооны өнөөдрийн /2021.01.13/ хуралдаан 10 цаг 40 минутад ирц бүрдсэнээр эхэлж, Засгийн газраас 2018.03.26-ны өдөр өргөн мэдүүлсэн Хөдөлмөрийн тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүд-ийн анхны хэлэлцүүлгийг үргэлжлүүлэх, Засгийн газраас 2021.01.08-ны өдөр өргөн мэдүүлсэн Эрүүл мэндийн даатгалын тухай хуульд нэмэлт, өөрчлөлт оруулах тухай хуулийн төсөл-ийг хэлэлцэх эсэх, мөн Засгийн газраас 2021.01.08-ны өдөр өргөн мэдүүлсэн Эрүүл мэндийн тухай хуульд нэмэлт, өөрчлөлт оруулах тухай хуулийн төсөл-ийг хэлэлцэх эсэх асуудлыг хэлэлцэхээр төлөвлөснийг Улсын Их Хурлын гишүүн, Байнгын хорооны дарга М.Оюунчимэг танилцуулав.

Хэлэлцэх асуудалтай холбогдуулж Улсын Их Хурлын гишүүн Ц.Мөнх-Оргил, С.Одонтуяа, С.Чинзориг, Б.Бейсен нар үг хэллээ. Улсын Их Хурлын гишүүн Ц.Мөнх-Оргил Эрүүл мэндийн даатгалын тухай хуульд нэмэлт, өөрчлөлт оруулах тухай хуулийн төсөл, Эрүүл мэндийн тухай хуульд нэмэлт, өөрчлөлт оруулах тухай хуулийн төсөлтэй сайтар танилцах хугацаа шаардлагатай байгаа учир хэлэлцэхийг хойшлуулах горимын санал гаргалаа. Улсын Их Хурлын гишүүн С.Одонтуяа мөн уг хуулийн төслүүдийг хэлэлцэх шаардлагагүй, С.Чинзориг “Ковид-19”-тэй холбоотой шийдвэрлэж буй асуудал нь бага учир яаралтай хэлэлцэх шаардлагагүй, Б.Бейсен мэргэжлийн зөвлөлөөс санал аваагүй учир хойшлуулъя гэсэн байр суурь илэрхийлж үг хэлэв. Ингээд Ц.Мөнх-Оргил гишүүний гаргасан Эрүүл мэндийн даатгалын тухай хуульд нэмэлт, өөрчлөлт оруулах тухай хуулийн төсөл, Эрүүл мэндийн тухай хуульд нэмэлт, өөрчлөлт оруулах тухай хуулийн төслүүдийг хэлэлцэх асуудлыг долоо хоногоор хойшлуулахыг дэмжье гэсэн томъёоллоор санал хураалт явуулахад гишүүдийн 61.5 хувийн саналаар дэмжигдэв.

Ингээд Засгийн газраас 2018.03.26-ны өдөр өргөн мэдүүлсэн Хөдөлмөрийн тухай хуулийн шинэчилсэн найруулгын төсөл -ийн анхны хэлэлцүүлгийг үргэлжлүүлж, Ажлын хэсгээс бэлтгэсэн зарчмын зөрүүтэй саналын томъёоллоор нэгбүрчлэн санал хураалт явуулж эхлэв. Ажлын хэсгээс 121 зарчмын зөрүүтэй саналын томъёолол бэлтгэсэн бөгөөд 1-81 дэх саналын томъёоллыг Байнгын хорооны 2018.01.06-ны өдрийн хуралдаанаар хэлэлцэн, шийдвэрлэсэн юм. Өнөөдрийн хуралдаанаар 82-121 дэх саналын томъёоллоор санал хураалт явуулав.

Монгол Улсын Их Хурлын чуулганы хуралдааны дэгийн тухай хуулийн 39 дүгээр зүйлийн 39.10 дахь хэсэгт Байнгын хорооны хуралдаанаар хуулийн төслийн анхны хэлэлцүүлгийг явуулахдаа зүйл бүрээр хэлэлцэхээр заасны дагуу гишүүд хэлэлцүүлгийн явцад хуулийн төслийн зүйл, заалт бүрээр асуулт асууж, Ажлын хэсгээс хариулт, тайлбарыг өгч байлаа. Түүнчлэн, хэлэлцүүлгийн явцад Улсын Их Хурлын гишүүн, Ажлын хэсгийн ахлагч Ц.Мөнх-Оргил хуулийн төслийн зарим зүйл, заалтад тайлбар хийлээ. Тухайлбал, цалин хөлс, ажлын байрны хөдөлмөрийн аюулгүй байдал, эрүүл ахуйн нөхцөлийг хангах, ажилтны эрүүл мэндийг хамгаалах, хөдөлмөр эрхлэлтийн харилцаа дуусгавар болсны дараа ажил олгогчийн хүлээх хариуцлага, жирэмсэн, 3 хүртэлх насны хүүхэдтэй ажилтныг уян хатан нөхцөлөөр ажиллуулах, хөдөлмөрийн сонирхлын маргаан, түүнийг шийдвэрлэх, хөдөлмөрийн сонирхлын хамтын маргааныг хөдөлмөрийн зуучлагчийн дэмжлэгтэйгээр зохицуулах, хөдөлмөрийн зуучлалын үйл ажиллагаа, сум, дүүргийн хөдөлмөрийн эрхийн маргаан зохицуулах гурван талт хороо, ажил хаях, ажлын байр түр хаах /локаут/-ыг хориглох, хойшлуулах, түр зогсоох, хөдөлмөрийн эрхийн маргааныг эвлэрлийн журмаар зохицуулах, хөдөлмөрийн эрхийн маргааны гомдол гаргах хугацааг сэргээх, хөдөлмөрийн эрхийн маргааныг шүүхээр шийдвэрлэх, ажил олгогч өөрт учрах эд хөрөнгийн эрсдэлээс хамгаалах, хөдөлмөрийн хууль тогтоомжийн хэрэгжилтэд хяналт тавих зэрэг зүйлүүдэд тайлбар өглөө.

Ажлын хэсгээс бэлтгэсэн хуулийн төслийн талаарх зарчмын зөрүүтэй саналын томъёоллоор санал хураалт явуулж, шийдвэрлэж дууссаны дараа хэлэлцэж буй асуудалтай холбогдуулан Байнгын хорооны гишүүд саналаа хэлж, байр сууриа илэрхийлэв. Үргэлжлүүлэн Ажлын хэсгээс бэлтгэсэн найруулгын шинжтэй саналын томъёоллуудаар санал хураалт явуулж, шийдвэрлэсэн юм.

Хуралдааны төгсгөлд Хөдөлмөрийн тухай хуулийн шинэчилсэн найруулгын төсөл -ийн хамт өргөн мэдүүлсэн Жендерийн эрх тэгш байдлыг хангах тухай хуульд нэмэлт, өөрчлөлт оруулах тухай, Эвлэрүүлэн зуучлалын тухай хуульд өөрчлөлт оруулах тухай, Төрийн албаны тухай хуульд нэмэлт, өөрчлөлт оруулах тухай, Нийгмийн даатгалын сангаас олгох тэтгэвэр, тэтгэмжийн тухай хуульд нэмэлт, өөрчлөлт оруулах тухай, Дипломат албаны тухай хуульд өөрчлөлт оруулах тухай, Донорын тухай хуульд өөрчлөлт оруулах тухай, Нийгмийн даатгалын тухай хуульд өөрчлөлт оруулах тухай, Хөдөлмөрийн аюулгүй байдал, эрүүл ахуйн тухай хуульд өөрчлөлт оруулах тухай, Цөмийн энергийн тухай хуульд өөрчлөлт оруулах тухай, Хөдөлмөрийн хөлсний доод хэмжээний тухай хуульд нэмэлт, өөрчлөлт оруулах тухай, Мэргэжлийн боловсрол, сургалтын тухай хуульд өөрчлөлт оруулах тухай, Захиргааны ерөнхий хуулийн зарим заалтыг хүчингүй болсонд тооцох тухай хуулийн төслүүдийг зүйл бүрээр хэлэлцэн, гишүүдийн гаргасан зарчмын зөрүүтэй саналын томъёолол болон Ажлын хэсгээс бэлтгэсэн саналын томъёоллоор санал хураалт явуулав.

Ийнхүү Хөдөлмөрийн тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүд-ийн анхны хэлэлцүүлгийг хийж дууссанаар хуулийн төслийг Байнгын хороогоор хэлэлцсэн талаарх санал, дүгнэлтийг чуулганы нэгдсэн хуралдаанд Улсын Их Хурлын гишүүн Ц.Мөнх-Оргил танилцуулахаар шийдвэрлэн Байнгын хорооны энэ өдрийн хуралдаан өндөрлөв гэж УИХ-ын Хэвлэл мэдээлэл, олон нийттэй харилцах хэлтсээс мэдээлэв.


Сэтгэгдэл

зочин [203.91.115.41] 2021-01-15 11:36:09

Тэтгэврийн хуулинд /цэргийн/ нэг анхаарах зүйл бий.Энэ талаар ганц нэг УИХ гишүүнд дуулгасан.Өвчний хориотой учир өөрөө явж чадахгүй байна.Энэ нь 2О1О оноос урагш тэтгэвэрт гарсан цэргийнхэн дотор цэрэгт ирэхээсээ өмнө улсад ажиллаж НДШ төлж байсан хүмүүс цөөн болов ч байдаг байх.Үүнийг бичигч миний бие гэхэд л улсад 8 жил биеийн хүчээр хөдөлмөрлөөд цэрэгт ирж,цэргийн албанд ахлагч,офицерын албан тушаалд зүтгэсээр 1999 онд цэргийн тэтгэвэрт гарахад нэгэнт хуульгүй учир энгийнээр ажилласан 8 жил ороогүй.Гэтэл үүнийг 2010 онд өөрчилж зохицуулах хууль гаргахдаа 10 жил ажилласан хүнд үйлчлэх,түүнээс бага жилтэйд үйлчлэхгүйгээр харин 2010 оноос хойш өндөр тэтгэвэрт гарч байгаа орчин үеийн хүүхдүүдэд болохоор цөөн жил ч байсан үйлчлэхээр гарчээ.Энэ мөн толгойгүй шийдвэр шүү.Харин ч хүйтэн дайны үеийн бүр хорогдоод дуусч байгаа хэдхэн хөгшин,за даа бараг хуруу дарахаар цөөн байх,учир нь цэргээс өмнө улсад ажилласан ховор /18,19 тэй залуучууд ирдэг шүү дээ./ тэр цөөнд нь олгомоор.

Зочин [202.131.244.210] 2021-01-14 02:37:49

Ажил олгогчдын нэгдсэн холбоо гэж Ганбаатар гэдэг хүн тамгыг нь халааслаад явж байдаг ҮЭ-ийн өрөөсөн дугуй нэг байгууллага байна. Хөдөлмөрийн тухай хууль зэрэг чухал хуулиуд дээр үйлдвэрчний эвлэлтэй хоршоод оролцоод явж байдаг, ажил олгогч талын байр суурийг илэрхийлэх субьект алга.

Зочин [192.82.75.178] 2021-01-14 01:18:07

ЦАГААН ЗАХТАНГУУД ХӨДӨЛМӨРИЙН ХУУЛЬ БОЛОВСРУУЛЖ ЧАДАХ УУ???

Зочин [66.181.184.237] 2021-01-13 15:41:21

Өчнөөн олон жил нийгэмийн даатгал төлчихөөд тэгээд бас хэвийн бус нөхцөлд ажиллаж байгаа иргэн дөнгөж өнөөдөр сургууль төгссөн хүүхэдтэй ижилхэн амрах гэдэг арай биш юм аа

Иргэн [192.82.77.95] 2021-01-13 12:58:17

Ажил олгогч нарт дэм болсон хууль гарахгүй л дээ.Ээлжийн амралт гэсэн балай юмыг авч хаях хэрэгтэй. Амраад тэгээд дээрээс нь цалин өгөөд,доод тал нь 20 хоног ажил олгогч орлого байхгүй.

Зочин [122.201.22.72] 2021-01-13 11:41:51

жилийн өмнө л бэлдээд сүйд болсон гээд байсан.өвчин далай мэт үерлээд ирэхэд нам дарна гээд байсан даа. гэтэл амьсгалын апарат ч байхгүй байсан байна даг


6 сэтгэгдэл байна
1000 тэмдэгт оруулах үлдлээ.
Уншигчдын бичсэн сэтгэгдэлд Medee.MN хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.
6 сэтгэгдэл байна
Уншигчдын бичсэн сэтгэгдэлд Medee.MN хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.