Украины Дээд Радагийн дарга Руслан Стефанчук ОХУ-тай хийх энхийн хэлэлцээний талаар Украины нэн чухал гурван зарчим буюу “улаан шугам”-ыг тодорхойлжээ.

Тэрбээр арваннэгдүгээр сарын 24-ний даваа гарагт Шведийн нийслэл Стокгольм хотод болсон “Крымын платформ”-ын дөрөвдүгээр парламентын дээд хурлын үеэр энэхүү гурван заалтыг дурдан, “эдгээр шалгуурыг хэн ч физикийн, хууль зүйн, ёс суртахууны ямар ч хэмжээнд зөрчиж болохгүй” хэмээн мэдэгдсэн байна.

Түүний хэлснээр Украин дараах байр сууринаасаа ухрахгүй аж. Үүнд:

-Оросын Украины нутаг дэвсгэрийг түрэмгийлэн эзэлсэн нөхцөл байдлыг ямар ч хэлбэрээр хууль ёсны гэж хүлээн зөвшөөрөхгүй.

-Украины батлан хамгаалах хүчинд ямар нэгэн хязгаарлалт тавихыг зөвшөөрөхгүй.

-Украин ирээдүйд ямар эвсэл, холбоонд нэгдэхээ өөрөө сонгох эрхээ бусдад алдах боломжгүй гэжээ.

Мөн тэрбээр Украин Европын Холбоо болон НАТО-д элсэх боломж нь аливаа энхийн хэлэлцээ болон аюулгүй байдлын баталгааны салшгүй хэсэг байх ёстойг онцолсон байна.

Түүнчлэн Оросын гадаадад царцаагдсан хөрөнгийг түрэмгийллийн “үнийн төлөөс” болгон ашиглах нь шударга гэж үзэж буйгаа илэрхийлжээ. Стефанчук “Европын Зөвлөл энэ талаар арванхоёрдугаар сарын 18, 19-нд шударга шийдвэр гаргана гэдэгт бид чин сэтгэлээсээ итгэж байна” хэмээн хэлсэн байна.

Зеленский: Киев түншүүдтэйгээ үргэлжлүүлэн зөвшилцөж байна

Стокгольмд болсон бага хуралд Украины Ерөнхийлөгч Владимир Зеленский цахимаар оролцож, үг хэлэхдээ Украин түншүүдтэйгээ, ялангуяа АНУ-тай идэвхтэй хамтран ажиллаж, улсаа “сулруулах бус, харин улам бэхжүүлэх” боломжтой зөвшилцлийг эрэлхийлж буй талаар мэдэгджээ.

Тэрбээр “АНУ-тай хамтран зохицуулж буй баримт бичгүүдэд бид маш мэдрэмжтэй асуудлуудыг тусгахыг чармайж байна. Үүнд Оросын талд байгаа бүх украин цэргүүдийг ‘бүгдийг бүгдээр нь’ зарчмаар суллуулах, мөн Оросын авч явсан бүх украин хүүхдийг буцаан авчрах асуудлууд багтана” хэмээн мэдэгдсэн байна.

Эх сурвалж: DW
Б.ЖАРГАЛ